Laptop bomb tasen agi airport nung mitba paidoktettsü:US

Washington, April 1 (Agencies) : US intelligence agency temi ashiba agi, kiralongrartemi electronic oset kar nung tapoktsü tapu balala inoktsü yangluteta tayimtsü anenba tesemtem nung mita reprangba tesem paidoktettsü, ta osangbenertemi ashi.
US intelligence tebilemtsü tali akümba bilemja ashidang, kiralongrartemi laptop aser tanga electronic osettem nung tayimtsü anenba tesemtem indang security den tokteptettsüsa tapoktsü yanglur memetetsüsa inoker, ta Hokolbarnü osangbenertemi ashi.
Yaküm küm aiben tendangba sülen, tanga mapangtem dang nungi tang parnoki laptop tem nung miima inoktsü yanglua aliba tapoktsütemji tayimtsü anenba tesem nung screener tem asoshi teputettsü kanga tasak asütsü, ta Federal Bureau of Investigation (FBI)-i metetdaktsü.
FBI-i iba tetendangbaji Transportation Security Administration-i mela aliba screener tem amashia tendanga liasü, ta intelligence ketdangsertemi ashi.
“Onok inyakyim dak keta aliba ama onoki intelligence osang tejangja kodanga yimjak nung memetetdaktsür. Ajisüaka kiralongrartemi item tapoktsütem tayimtsü ajanga belenshitsü nükjidongser inyaktepba onoki asadangteta lir,” ta Department of Homeland Security-i sangdong ka ajanga metetdaktsü.
US aser Europe linüktemi item tapoktsütem putettsü asoshi X-ray dang nungi tajungba inyakyimtem amshir. Onoki tapoktsü menemtetba azü aser tapoktsü ania oa apuba osettem amshir, ta America nunger ketdangsertemi ashi.
FBI nung mongintemi laptop tem nung battery balala amshia miima inoktetba tapoktsü balala screener tem agi kechiba meputeter ibajia tendangogo.
March 21, 2017 nü nungi tenzüka Muslim lima 8 nungi US-i indang indanga aoba tayimtsütem nung electronics oset nokdangogo, ta osang ajanga ashi.
Item tayimtsütem nung cellphone tem dang tuluba, Passenger tem indang electronic osettem parnok indang check sür alib süngden mesüra yangkhu tulu nung inoka bendaktsür.
Laptop battery inokba tesem nung tapoktsü miima inoktsü inyakyim putetba sülen nungi lendong nungi kümzüktü asoshi iba tenokdangba tenzük.