Pakistan nung Minister ka dena 10 pokset

Islamabad, August 16 (Agencies): Deobar nü Attock yimti nung taküm tenla agüja pei tamang nung bomb alenloker apoker kati Pakistan nung Punjab Home Minister Shuja Khanzada dena nisung ter poksetogo, ta ketdangsertemi metetdaktsü.
Khanazada ya Pakistan Army nung colonel mapa nungi anisüngzüker aliba nisung ka liasü aser iba bomb lendong nung ki chirepba rangben pa dak amongloka mejungi yiruba ajanga mekümzükteti asü, ta Punjab chief minister meyong advisor Syeed Ilahi-i Geo TV dang ashi.
Ministry sangdong ka ajanga ashiba agi, iba lendong ya shibangtsür aliba Lashkar-e-Jhangvi (LeJ) teloki agütsü ta küli agiogo.
Iba lendong ya nisung kwii agütsü mesüra bomb ji koma sür apok aji ano mejengjai lir.
Tan July ita nung LeJ tekolakba Malik Ishaq alenseta südaktsüba sülen yaküm October ita nung home minister mapa benlokja alisang Khanzada dangi pa tepsettsü amokmerenba osang aika arua liasü.
Deobar nü atalokba bomb lendong nung Home Minister meyong office rangben ajasaa poksa aser iba chirepba jagi minister ba dena parnok nisung 20-25 shi nembanga liasü. Khanzada’er jabaso Sohrab-i ashiba agi, iba bomb apokdang tebu office telung nung liasü.
Iba office ki chirepba nungi tasümang aika atsütetogo.
Kiralongraba nükdangba mapa nung Khanzada yagi teti tongti shilem agia liasü kechiba süra state nung temzüng ozüng shitak ayutsübaji par department mapa lir.
Iba lendong nung yaritepertem kanga mazüngi inyaktepdar aser helicopter-a ka iba maparen nung amshidar, ta media ajanga ashi.
Prime Minister Nawaz Sharif-i iba tatalokba aitsüogo.