Osama’er jabasoi US amaktsü ashir

Washington, August 16 (Agencies): Asür Osama bin Laden’er jabaso Hamza, shiba dang ‘Crown Prince of Terror’ ta ajar, pai al-Qaida züngsemtem dang US aser US den lokteper aliba linüktem nung aliba yimtitem shia nung lendong agüjang ta shiogo.
Al Qaeda tekolakba asüsang asür, Osama’er jabaso, arishi küm 20 tema sangi Al Qaeda züngsemtem dang Washington, DC, Paris aser Tel-Aviv yimtitem nung lendong agüjang ta video osang ka ajanga ashi.
Jihad atema rarartem Middle East nungi apusoa oa US, Jewish America nunger aser US den lokteper aliba linüktem amaktsü tetuyuba agütsüba mapang Hamza bin Laden-i “Ibai nü mapa lir,” ta ashiba SITE Intelligence Group ajanga metetdaktsü.
Al-Qaida-i Bin Laden-i inyakbatem tanaben meyipa inyakner, ta SITE executive director Rita Katz-i ashi.
“Iba kiralongrar telok yagi tarutsü nung parnok anishitsü asoshi Hamza nübo aginer: shiba par nübur ajaki meimer, kecha aibelena meinyaker aser telung rara nung shilem agir,” ta Rita-i twitter ajanga lemsatepa liasü.
9/11 lendong atalokli noksa kar nung Hamza ya Al-Qaida nung taintem dang sangro zünga sayua lir.
2011 küm US Navy SEAL-i Pakistan nung Osama aliba tesemi oa pa kahsetba mapang Hamza bo jenbua liasü.
Pai US aser US den lokteper aliba linüktem amaktsü ya June ita nung tetuyuba agüja liasü kechiba süra pai iba ya Taliban nung lenir, asür Mullah Omar dang nangzükba mapa ka lir, ta New York Daily osang ajanga metetdaktsü.
Tesüngmangtsü kaji iba ya metetdaktsüdang Hamza bin Laden-i Islamic State of Iraq & Syria (ISIS) tenüngbo khen danga mesüok, ta Rita-i ashi.
Hamza bin Laden tetsü tanutsü, tebu tanubo aser tetsü tanabula nunger tan ita tetenzüklen England nung tayimtsü tsüoka asü.
Hamza-i sangro ka azüngba nungji America, Britain, France aser Denmark raksatsütsü indang shia liasü aser kiralongraba mapa asadangertemi pa ya al-Qaida nung tekolakba akümtsü südi ta tsübua bilemer.