Mapa nung meshitaki shimba

Mapa inyaktsü atema shimer ser nung mapa inyak mashi aser memetet ka shimra koma asütsü ? Tanü Nagaland government-i iba tasüngdangba ya junga langzütet nung dang Nagaland tajungba küma yanglushitettsü. Küm shia Nagaland governmenr mapa nung nisung aika shimoker saka mapa tazüng adokbabo memetetter. Ibayongji, office nung inyakertem den tesendaktep junga malirtembo mapa junga inyaktettsüsa temetetba peria liaka mapai meitetter. Aji oda, küm nung Nagaland Public Service Commission (NPSC) ajanga government mapa tazüng adokba kar metetdaktsüba dak alaka department kechaia pei department nung mapa tazüng adokba osang lanurtem asoshi osangkakettem ajanga metetdaktsüba mangu küm talangka arur. Tanga department tilatem ken yutsür department tulu, tatishitsü agi, Police, School Education, PWD, PHE aser Medical ama nung mapa tazüng adokba indang kenyongi memetetdaktsüi dang telong nung tulurtemi pei shimnütsü shimba agi mapa bushir lanur tajung aser tetemsü aika taküm ashiokdaktsüdagi. Atangji, yimjak nung metetdaktsü aser metendang shimba purtemjia Naga nungerbo Naga nungertemsa asütsü, ajisüaka Naga nunger lanur ajak nem mapai aitsü asoshi kasasa maongka magütsüi yimsüsür aser tulurtemiang shimbaji kanga tim masü. Ibaji alima nung lendong jaokba mapa ka asütsü. Mapa inyaktsü shimer asünungji tamasa nisungbaji mapa inyak ashir asütsüla aser mapa inyak ashirtem aika alinungji parnok rongnunga tendanger tajungtiba agitsüsa yimjak nung osang sangdonger külenang tarur rongnung tendanger agitsüla. Tanübo Home department kecha nung taoba küm pongo tsüngda shinga nema memetetdaktsü aser tatidang magi dang Nagaland police asütsü atema nisung meyirijang ana dak tali shimba osang angashir. Ibaji taoksatsüka lir. Police inyaktsü atema shimertem asoshi balaka tashishitsü aika lir. Parnokjibo tar, teku aser temepu ajak jungjunga asadanga repranger külenang ano tashidak ali mali aser temang tashi ait mait tendangtsü. Item ajak nungji temsüa angu nung dang shimoker training jungjunga agütsür pei lima asoshi mitkar mapa inyakdaktsür. Itemjibo jetpera nung kenyongi balaka, tangu dang angu nunga senso ajaki nümadanga bilemer. Ajisüaka, shinga nema memetetdaktsü aser metendangi mashimashi shimba police rogotem temang aser jaklaji komaka asütsü ta kanga shisabolua bilemer. Aji oda, School Education nunga joko küm talangka tesayur inyaktsü asoshi mapa tazüng adokba indang lanurtem nem yimjak nung osangkaket ajanga metetdaktsüba mangr. Ajisüaka, küm shia tesayurtem aika shimdagi aser tesayurtemji tatidang magi shimer asünungji temsüa ali mali aser tanurtem dang junga sayutettsüsa tazüngba ama temetetba aser sempet ali mali kecha memeteti shimer. Nagaland tarutsü atema lendongji aji lir. Mapa ajak dang nungi tesayurtem mapasa tongtibangba, anungji tesayur mapa yabo ita sen achitsü kisüng tebilemba nung masü saka tanurtem tajung kümdaktsütsü temulungtetba nung bendanga agüja jungjunga inyaktsüba mapa ka lir. Iba amaji medical junga mazüngba nisung nurse mesüra doctor inyaktsü shimra koda asütsü ? Tetsübutsü lendongji aji ka asütsü. Iba kasaji engineering junga mazüngba nisung ka engineer mapa inyaktsü shimra koma asütsü ? Item jagi nübortem lendongi idaktsütsü aser alima akoksadaktsütsübaji temetet dang lir. Joko, tanü putu nungbo mapa ajak nung tajungtiba aser tekaraba inyakba nisung nüngdaker. Tetezü, iba putu nung alirtem ya shinga alima nung mapa mashi aser meinyaki ita sen kisüng chia alitsüba putu masü. Aji oda, joko Nagaland government inyakyimtem ya asüngtettsüla aser akok tashi tashiyim aser sübokrem agi mashilen nungi masü saka indangindanga mapa inyak ashir aser bendanga agüja inyaktsü pur lanurtem shimtsüsa kodangsa mapa adokdir, temsüa alir lanurtembo ajak shilem agia merangteptsüsa osangkakettem ajanga metetdaktsütsüla aser department ajaki iba amaji inyakang ta nübortemia ola adoktsüla.