PM-i J&K nung Chenani-Nashri tunnel lapoktsü

April 02, 2017 nü Jammu-Srinagar National Highway nung Ato kilonser, Narendra Modi-i Chenani-Nashri tunnel lapoktsüba sülen iba tunnel repranga noksa nung angur. 

Srinagar/New Delhi, April 02 (Agencies): Tanü Jammu-Srinagar National Highway nung Ato kilonser, Narendra Modi-i Chenani-Nashri tunnel lapoktsüogo.
Chenani-Nashri tunnel lapoktsüba sentong nung Jammu & Kashmir Angh, N N Vohra, state chief minister, Mehbooba Mufti aser Union transport minister, Nitin Gadkari nungera densema liasü.
Iba tunnel lapoktsüba sülen Vohra aser Mehbooba nati meina Ato kilonseri tunnel nungji tetsüng agi tatsüka jaja, iba sülen gari ajanga ao.
Linük nung tunnel talangtiba, kilometer 9.2 talang Chenani-Nashri tunnel ya küm pongu agia yanglu aser iba project nung sen crore 2,500 intoka liasü.
Iba tunnel ajanga Udhampur aser Ramban district na sendakteptsür, koba ajanga kilometer 30 talang Jammu-Srinagar national highway paidoker lenmang kanga tatsüba akumer.
Iba dak alia iba tunnel yangluba ajanga gari nung senzüba mapang ghonda ana kümzüker. Iba lenmang lapokba ajanga gari nung totzü atsükba nungi anogo shia sen lakh 27 kümzüktsü.
Iba tunnel ya metre 1,200 tema nung yanglua lir aser tunnel nungsa traffic & fire control systems, video surveillance, FM connectivity aser transverse ventilation systems lir.
J&K nung mapang shia tzünglu aruba, anentsüh aluba aser rürjep alaba ajanga ghonda aika lenmang shibanger, ajisüaka tang iba lenmang lapokba ajanga tesem nung shishilembaba aser tourism ajungkettsütsü.
Tanü nikongdangsa Ato kilonseri Udhampur, Battal Balian tesem nung lokti senden ka nung jembia liasü.
Iba sentong nung jembidang Ato kilonser, Narendra Modi-i, “Kashmir nunger lanur kar kanga mazüngi long agi aondang lanur karbo Jammu and Kashmir nung terenlok alitsü atema tenemlen long tepsa,” ta metetdaktsü.
Modi-isa, iba tunnel atangji nung tembanga yanglutettsüsa meranga inyaker lanurtem nem tenüngsang agutsür, ta ashi.
“Iba tunnel yangluba ya India sorkar sen agi yanglu. Ajisüaka iba tunnel nung Jammu and Kashmir lanurtem asentzü teronem-a lir,” ta paisa ashi.