Sindhu aser Viktor nati takok marok angu

New Delhi, April 2 (Agencies) : Tanü Deobarnü Siri Fort Sports Complex nung India tsür badminton asayar, World No 3, Sindhu-i 21-19, 21-16 agi World No 1 Carolina Marin madak takok anguba ajanga India Open Super Series 2017 marok benogo.
Sindhu-i pei linük nung mezüngbuba asaya tulu takok marok angubaji ibai lir. Lai iba asaya minute 47 nung kokadok.
Lai tanü iba final asaya nung atonga atonga koka takok marok anguba ajanga Spain tsürla tena 10 ben asayaba nung tenaprongi pungubenben (5-5 ) akoker asütsü. Yaküm Marin tesüsa akokbaji yaküm Dubai nung BWF Super Series nung akokba lir.
Tena maya tsüngda tebur asayaba mapang Viktor Axelsen-i kodanga makok alisang Chou Tien Chen madak takok ngua mezüngbuba India Open Super Series takok marok benogo.
Deobarnü World no 4 Axelsen-i iba final asaya minute 31 tsüngda nung 21-13, 21-10 agi akok.
Iba final asaya Delhi nung asayaka Denmark nunger aika arua pa pusemba ajanga par lima asayar amai liasü.