NTC-i sorkar dang Framework Agreement metetdaktsütsü akhanger

Dimapur, April 2 (TYO) : Tawa Kohima Division NPF Convention nung jembidang Nagaland Chief Minister aser NPF President, Dr Shürhozelie Liezietsü-i “NPF-i 3rd August Framework Agreement 2015” pusema nungiter ta ashiba osangkakettem nung sangdongba nung Nagaland Tribes Council (NTC)-i o apur ta sangdong ka nung metetdaktsüogo.
Nagaland nung tang teinyakdak Chief Minister ji Political Party ka nung tekolak dang masü saka Nagaland state indang tekolakba lir. Anungji, pai Nagaland nung alir ajak indang tebilemtsü abener, ta Media Cell, NTC sangdong ka nung shia lir.
“Party President aser Chief Minister-i GOI o NSCN (IM) na tsüngda tenangzüktep agiba nung tasüngdangba kecha melii pusema nungiter ta ashiba ajanga state lennirtemi iba tenangzüktep nung keta aliba onüktem meteta lir ta onoki bilemer. Anungji, state lennirtemi tenangzükba nung enoka aliba onüktemji Nagaland nung alir ajaki metettsü aser angatettsü atema yimjak nung metetdaktsütsü ayongzüker” ta parnokisa ashi.
Küm ana tejakdang India sorkar aser NSCN (IM) tsüngda Framework agreement agi aser iba onük nung tongti süa sendaktepa alir shinga medendaktsüi dang agi. State nung tekolaki iba ya ajanga party-i yimten telok ka dang pusema nungiter ta mangatettsüla ta olen ka shiogo. Süra, kobala inyakyim ka ajanga tenangzüktep agir aliba ka nung tanga Naga Yimten teloktem aser sendaka alirtem anioktsü ta NTC-i asüngdanger, ta Media Cell sangdong nungsa metetdaktsü.
Iba framework kübok tenangzüktep kar danga agira ibaji tashiyim agi ozüng benokba ka ama züngshitsü, kechiyong iba framework ya tongti süa sendaktepa alir shinga den asüngdangya mesüi yangluba lir. Anungji, iba ajanga khuret kar dang adokra, Nagaland state lennirtemi iba atema telangzüba agütsütsüla, ta NTC-isa nenshia metetdaktsü.