Centre-i Tripura sorkar atsüngdoktsü meranger: CPI-M

Agartala, April 3 (Agencies): BJP nungi Central minister temi Tripura nung Left Front sorkar atsüngdoktsü atema osang tai prokshir, ta Tripura nung CPI-M-i tai tongloktsüogo.
“Hopta shia BJP (Bharatiya Janata Party) nungi Central minister temi Tripura semdanger aser parnoki Left Front sorkar indang osang tiyazü prokshir” ta Communist Party of India-Marxist lennir Bijan Dhar-i ashi.
“Tripura nung Left Front sorkar atsüngdoktsü atema Central minister temi osang tiyazü aser olulu prokshir. Tripura anema rongsenkettsüng mokdang ka ayongtsü atema mapa inyakba ajiteter” ta Dhar-isa ashi.
Centre-i democratic inyakyim alema inyakba anema lungkak aittsü atema Tripura nung party State committee-i Honibar aser Deobar nung telemtetbatem agiogo.
“Uttar Pradesh nung takok anguba sülen, lennir kari Tripura nung Left party tem atsüngdoktsü atema pungmang pungmanger. Iba ya kodanga asangsang nung mataloktsüba pungmang ka lir” ta CPI-M State secretary-i ashi.
“CPI-M-i MGNREGA (Mahatma Gandhi National Rural Employment Guarantee Act) nung anogo 200 indang mapa agüjang ta takhangba agütsüdang, BJP sorkari iba scheme anentsütsü meranger. Ano, BJP-i tanga yimtenren teloktem raksatsütsü meranger” ta paisa aitsü.
Ajisüaka, BJP-i iba onük meyipa aitsüogo. “Tripura nung Left Front-i ozüng alema sorkar ketdangsür aser ibaji Supreme Court-i sorkar tesayur 10,323 mapa nungi anentsüba ajanga kuli sayur” ta Hombarnü BJP State president, Biplab Kumar Deb-i osangbener dang ashi.
Radha Mohan Singh aser JP Nadda na dena Central minister temi State sorkari sector aika nung tamakok aludaktsüba indang tuteta metetdaktsüogo aser Central funds timi mamshiba indang osangtem shiogo, ta Biplab-isa shisem.