Pakistan linüki J&K nung tensa meraksadaktsütsüla: Mehbooba

Srinagar, April 04 (Agencies): Tanü Jammu & Kashmir Chief Minister, Mehbooba Mufti-i Pakistan dang, state nung telungpur nungita tensa meraksadaktsütsüla, saka yimjung ken o jembitettsüsa yimjung yanglutsüla, ta ashi.
Anantnag constituency kübok Dooru nung election senden ka nung jembidang lai, “Arrtsü adena oa alirtem (Pakistan) dang state nung telungpur nungitba aser Vajpayee (Taoba mapang Ato kilonser AB Vajpayee) mapang nung tentetba prangpong sobaliba anentsü ni mepishir,” ta ashi.
“Jammu and Kashmir nung yimjung bener arutsü atema onok yariang, iba sülen yangi aser idakjia (Pakistan occupied Kashmir) onük nunga ken o jembitettsü,” ta CM-isa ashi.
Tang Chief Minister-i Anantnag Lok Sabha menden by election atema la adianu aser PDP candidate, Mufti Tassaduq Hussain asoshi nüboyimtsüdar. Iba menden ya yaküm lai azüngtetja liasü.
Mehbooba-isa, 2015 küm December ita nung Ato kilonser, Narendra Modi-i Pakistan semdangba ajanga New Delhi aser Islamabad tsüngda ken o jembitettsüsa lenmang lapoktsü ta imlaa liasü, ta metetdaktsü.
“Narendra Modi-i Nawaz Sharif (Pakistan Ato kilonser) ajurutsü atema Lahore-i ao. Ibaji ajanga teimla tasen ka liasü, saka tia makai kiralongrartemi Pathankot amak,” ta Chief Minister-i ashi.
“Iba ama tensa tamajung ya teti atema tangbo masütsü. Vajpayee-i yamaisa jembia aru ‘nai medemer melena medemtettsü akok, saka kiyongerbo (India- Pakistan) memelentettsü’. Asenoki kiyonger tajung ka ama alitsüla,” ta lai ashi.