Kiralongra anema rongdak süa inyaktsüla: Tir Pranab

New Delhi, April 04 (Agencies): Tanü linük Tir, Pranab Mukherjee-i, tang tesüsabuba kiralongrartemi Russia nung St. Petersburg amakba ya ajanga kiralongra anema rongdak süa inyaktsüla ta nenshia asenok nem metetdaktsür, ta ashi.
Mukherjee-isa Russia Tir, Vladimir Putin dang, tang iba ama mangyim mapang ka nung India nungeri Russia den külemi mangyimer, ta lemsatepogo.
Putin dang osang ka ajanga Tiri yashi St. Petersburg nung aliba metro nung kiralongrartemi lendong agutsüba nung asürtem den külemi mangyimer, ta metetdaktsü.
“Iba lendong ya ajanga, kiralongra anema alima linüktemi rongdak süa inyaktsüla ta asenok dang nenshia ajungshir,” ta Tiri ashi.
Mukherjee-i, tang ama mangyim mapang nung India nungeria Russia nunger den mangyim lemsateper aser asürtem kinüngertem dena mangyim lemsateper, ta ashi.
“Iba lendong nung asürtem tekaraba nung taneptsü angutsü onoki sarasademtsür,” ta Pranab-i osang nungji metetdakja lir.
Yashi nisung kati pei taküm tenla agüja bomb amshia amakba lendong nung nisung 14 tepset aser aika yiruja liasü.
Yashi Saint Petersburg, Russia nung aliba metro station nung bomb lendong ana atalokdang tajemba agi nisung 12 asü aser aika yiru aser iba lendong ya Russia Tiri yimti nung Belarus Tir, Alexander Lukashenko den ajurutepa senden ka amenba mapang ataloka liasü.
Kremlin otongdar Dmitry Peskov-i, iba lendong ataloktsü indang ya Tir, Vladimir Putin nem jelia metetdaktsür liasü, ta ashiba Russia nunger osangbenertemi metetdaktsü.