Mokokchung nung ita shia amenba DPDB senden menogo

Mokokchung, April 04 (TYO): Mongolbarnü Conference Hall of ADC Planning Mokokchung nung ita shia amenba Mokokchung District Planning & Development (DPDB) senden menogo.
Iba senden nung züngsemtem pelaa agizükba sülen jembidang Deputy Commissioner aser Vice Chairman DPDB Mokokchung, Sushil Kumar Patel IAS-i ali ken o nung onüktem benoka, department meyong ali kümzüka ayutsü atema sorkari temetetdaktsüba ka agutsüogo, ta ashi.
Iba dak sentakba nung pai office ajak nung tekolakpurtem dang, tangari ali atsünga magitsü aser mangatettep ken otem madoktsü atema office boundary den department nem lemzüktsüba kimongtem atsü agi atsübanga ayutsü atema mepishia metetdaktsü.
Deputy Commissioner-isa department tem dang, department-i anguba li dak sentakba kulikakettem ajak district administration nem agujang, aser ibaji district administration-i rizünga ayutsü aser department balala nem ali ‘patta’ agutsütsü, ta ashi.
Senden nungsa jila nung kilentzü aoba tesemtem indang tebilemtsü benoka jembi. Iba dak sentakba nung Deputy Commissioner-i PWD aser tanga tim departments dang, tzüngluru mapang nung jila nüburtemi timtem majurutsü atema ano tali temerangba inyaktsü mepishia liasü.
Senden nung Medical Superintendant IMDH, Dr. Medem-i April 1, 2017 nüng Tuli aser Changtongya jila na nung Disability Certification Camp ayonga agiba osang metetdaktsü.