Mkg nem SBM kübok jana bendena indoktsü pickup 6 aser janabong agütsü

Mongolbarnü Mokokchung nung SBM Brand Ambassador, Supongmeren Jamir-i pickup gari lema agütsüba nung shilem agiba noksa angur. Mokokchung, April 04, 2017.

Mokokchung, April 4 (TYO): Mongolbarnü Mokokchung nung Swachh Bharat Mission (SBM) mapatong kübok jana bendena indoktsü asoshi pickup gari 6 den janabong (rubbish bins) alemba sentong ka Mokokchung Municipal Council (MMC) complex nung liogo.
Iba sentong nung tetushi tesemdanger SBM, Brand Ambassador Supongmeren Jamir ajanga item pickup gari aser janabongtemji lemshia agütsü.
Item pickup garitemji Mokokchung Town kübok; Alempang Ward, Artang Ward, Mongsenbai Ward, Majakong Ward, Kumlong Ward aser Kichutip ward tem nem lema agütsü.
Janabongtemji Mokokchung town nung aliba telok balala den tongtibang tesemtem nung ayutsü asoshi lema agütsü.
Sentong nung tetushi tesemdanger Süpongmereni jembidang, “Swachh Bharat Mission” ya sorkari tenzük, saka iba nükjidong ya nüburtemi mangatetra iba mission ya takok mangutsü, anungji, ibai arok khuret süa nübur ajaki shilem agitsü asoshi tayongzükba ka agütsü.
“Iba nükjidong mangateti alirtem dang tangatetertemi angatetdaktsütsüla”, ta paisa inyakdaktsünüba o ka ashi.
Iba pickup gari anepalutsü asoshi sorkari sen magütsütsü, anungji ward shiai gariji kanga junga anepalutsüla aser tangar ward-tem asoshia tatishitsü keta amshitsü asoshi Mokokchung D.C, Sushil Kumar Patel IAS-isa mepishia metetdaktsü.
Pickup garitem ya SBM kübok Department of Urban Development nungi agütsüba lir, ta angazüker.
Ward shia merükmejuba tsütsü anepalutsü asoshi ‘Sanitation Committee’ shimogo aser item committee pur asoshi tesayuba sentong ka April 7, 2017 nü ayongzüka lir, ta Mokokchung ADC & MMC Administrator Bendanglilai metetdaktsü.
Taruba May ita nungji yimkong nübudoka talisa yimti nung kilenzü (nallah) alibatem merüka amungtsü sentong lir, ta laisa metetdaktsü.