Küm 5 tsüngda Assam temaba jenjangi atutsü: Baba Ramdev

Guwahati, April 04 (Agencies): Assam terenlok asoshi state sorkar den teka amteper inyaktsü asoshi Yoga tesayur, Ramdev-i telemtetba agiogo.
‘Namami Brahmaputra’ benjungmong tongti tesem nung lokti den jembidang Ramdev-i ashiba agi, “Assam dak temaba jenjang tongtettsü asoshi taoba otsütem aser yimyatem keta lir. Chief Minister Sarbananda Sonowal kübok sorkari küm 5 tsüngda Assam ya state tem rongnung temaba jenjang nung züngsemtsü asoshi ajungkettsü atema meranga inyakdar. State temaba jenjang tongdaktsütsü asoshi nia inyaktsü molungtetogo, aser Tezpur nungbo tenzükogo.”
Ramdev-i ashiba agi, par teloki küm 5 tsüngda school, mozüki, ‘gaushalas’ aser mapa inyaktsü asoshi maongka agütsütsü. “Asenok ajak senteper inyakra iba ya akoktsü,” ta pai ashi.
Iba sentong nung pai ‘yoga’ aiba yimya kar lokti dang sayu. Maneni lokti peladakja pai sentong nung densema aliba Union MoS Babul Supriyo anisema shilem agidaktsü.
Tsüngsang mongpu majungba ajanga Supriyo o mejembi, saka nüngtugu Hindi film ken kar tena liasü.
Chief minister-i anir Minister tem aika iba sentong nung aden.