Anü tashi amshia Arunachal yimtsüng nung electricity agütsütsü

Itanagar, April 04 (Agencies): India-i Arunachal Pradesh, China arrtsü nung yimtsüng 900 shi nung ‘advanced off-grid renewable energy kits’ amshia electricity agütsütsü; ibaji ajanga kibong 16,000 nung electricity agütsütsü, ta power minister Piyush Goyal-i ashi.
Iba project inyaktsü atema sorkari tan hopta tatemlen company tem tenüng meshitsü. Iba project nung maneni off-grid street lights 4,000 amenloktsüba densema lir. ‘Renewable energy’ dak sendakba nung osettem jenjang tajemba akümba ajanga tezülen aliba tesemtem atema iba ya amenloktsü asoshi tajungba kümogo, kechiyong electricity line yangluba dang nungibo iba ajanga mapang tajemba agitsü. ‘Energy efficient’ ‘bulbs’, ‘fan’ aser gondha 8 tashi back up agütsüba battery tem agütsütsüba iba sentong nung densema lir.
Kija atema ‘off-grid solar power systems’ tila aser ‘micro-grids supplying solar power’ shishilembaba tesem kar atema amshibatem, India kinük nung aliba yimtsüngtem atema electricity agütsüba yimya tajungba kümdar. Iba sentong ya Ato kilonser Modi-i ‘Deen Dayal Upadhyaya Gram Jyoti Yojna’ kübok 2018 May 1 tashi nungbo yimtsüng 18,452 nung electricity agütsütsü sangdongba sentong den kanga tapet lir. 2015 küm iba sentong amenlokba nungi tenzüka tang tashi nung iba sentong kübok yimtsüng 13,002 nungbo ‘electricity’ agütsüogo.
Goyal-i ashiba agi, Centre nung aliba sorkari ‘electricity sector’ nung tali ochishia inyaktsü asoshi merangtsü. Iba ya ataloktsü asoshi ‘national power portal’ ka amenloktsü, koba nung tang aliba ‘power sector’ nem data agütsüba ‘application’ ajak sendakteptsü.
“Onoki taruba power minister tem senden nung state ajak dang parnoki power aliba jenjang aser ‘merit order’ tem tejangja agütsütsü asoshi asüngdangtsü,” ta Goyal-i ashi.