Waromung yimdak arem shiti-i kiojen raksatsü

Dimapur, April 4 (TYO): Taoba hopta arem shiti telok kati Waromung yimdak Tzuring Yinten tesem nung kiojen aika raksatsüogo.
Tzuring Yinten ya Waromung yimtsüng lushi nung lenden tajung ka lir. Iba tesem ya Jangpetkong nung Mokokchung nungi kilemoter 60 shi pilar lir. Waromung Senso Mungdang ajanga iba lenden ya ‘model village’ ka kümdaktsütsü tebilemba nung sorkar dangi bendanga lir.
Taoba kümtem nunga iba tesem nung tzülu nung tsük aser süngdong balala tema aliba arem shiti ajanga raksaja liasü. Tawa-a shiti teintet 10 shi adoka tsük aser kiojen tasen yanglur aliba dena raksatsüogo.
Tang tashi nung iba teraksatsüba ajanga takoksa anguba yimdak putumenden aser sorkari ano masadangi lir, saka ajak senteperbo lakh aika adoktsü, kechiyong shititemi ki tasen süa aliba, tsük aser süngdong tema aliba aika raksatsüogo.
Iba dak sendakba nung Waromung Village Council-i sorkar dang shiti nokdangtsü asoshi mapa inyaktsü atema mepishia metetdaktsüogo, kechiyong iba ajanga rongsen aika lalur, aser aluyimer kanga tsübuteper.
Taoba kümtem nunga yimdaklirtemi ‘firecrackers’ nunger amala amshia shiti meindoka liasü, saka shititem taküm tesashiba aser meintsü mekoki liasü ta yimdaklirtemi ashi.
Waromung Village Council-i iba dak sendakba nung sorkar dang shiti nokdangtsü asoshi jenjang tapet agitsü aser teraksa ajurua aliba yimdaklirtem nem senotsü teyari agütsütsü asoshia mepishia metetdaktsüogo.