NSDMA-i kümdanga alitsü metetdaktsür

Dimapur, April 4 (TYO): Nagaland State Disaster Management Authority (NSDMA)- Home Department kübok Emergency Operation Unit-i Indian Meteorological Department (IMD) nungi weather data aser Soil & Conservation Department nungi local weather data bendena asadangogo.
IMD aser ISRO indang Satellite Imaginary Analysis ajanga NE region nung mepet aika aliba sayur aser ibaji ajanga Nagaland kübok tesem balala nung yipru aser tzünglu tesashi arur. Iba dak sendakba osangtem District Disaster Management Authorities (DDMAs) nungi bendendar, ta Khrienuo Mehta, Comm. & Secy. to the Govt. of Nagaland-i sangdong ka nung metetdaktsü.
DDMA, Zunheboto ajanga, Zunheboto Town aser Pughoboto Town nung tzünglu aruba ajanga anentsüh aluba osang sangoktsüogo aser iba lendong ajanga kiojen aika raksaba osang metetdaktsüogo. Maneni DDMA, Dimapur-ia April 3, 2017 nü yipru aondang Chumukedima nung teraksa ajuruba osang sangoktsüogo. NSDMA- Home Dept.-i DDMA balala den osang agitepdar aser ibaji bendener state sorkar ket nung agütsütsü.
Indian Meteorological Department (IMD) ajanga hopta piyong tzünglu arutsü ta metetdaktsüogo anungji, public ajaki kanga kümdanga alitsü metetdaktsür, ta NSDMA-Home Dept. sangdong nungsa metetdaktsüogo.