Sen taila anema raraba nung B’desh-i India yaritsü

New Delhi, August 16 (Agencies): Bangladesh linüki India dang, sen taila, Fake Indian currency notes (FICN) tebilemtsü anema raraba nung yaritsü ta shiogo.
Linük nung nisung shibelenba aser temesepba mozü balala shibelenba den mapa tamajung aika inyakdang sen taila jenti amshir.
August 12-13 nü Bangladesh yimtiba, Dhaka nung FICN onük nung joint task force senden mena liasü, aser iba mapang nung Bangladesh-i India dang, Bangladesh linük rongsenkettsüng nung kongshia sen taila amshitepba mittsü asoshi mera aika agiogo ta shiogo, ta sorkar osang ka ajanga ashi.
Iba senden nung Bangladesh tsütsülen nungi additional inspector general (Infrastructure & Administration) Mohammed Mokhlesum Rehman-i, yangji (Bangladesh) nisung shibelenba aser temesepba mozü shibenlenba den mapa tamajung balala inyaktsü asoshi FICN amshiteper ta shiogo.
“Item ajunga ya Bangladesh rongsenkettsüng asoshi amokmeren tulu ka lir aser Bangladesh renlokba lenmang nung tetsükdaktsü ka lir. Anungji Bangladesh-i FICN amshiba nokdangtsüji kuli aika adoker,” ta osang ajanga ashi.
India tsütsülen nungia Inspector General of National Investigation Agency nungi Sanjeev K Singh-i FICN inyakyim indang tejangja rasa-a shiogo. “High-quality sen taila ji tang India nung kiralongraba mapa inyakba nung amshitsü asoshi linük kar agency temi amshir,” ta pai ashi.
“FCIN pua aliba Forensic tendangba ajanga high-quality FICN ji sen printing machine tajung kar amshia yanglur, aser item oset aser raw material temji sovereign state tem nung ang angur,” ta India-isa ashi.
Linük anapronglai sen taila amshiba intelligence osangtem lemsateptsü bangjemtepogo.
Osang ajanga ashiba agi, Bangladesh nung aliba international airport tem, integrated crossing point tem, immigration point tem, bank aser financial institution tem nung sen taila putetba gol amshitsü atema India-i agütsütsü melungogo.
Iba dak alia Bangladesh nung sen taila tendangtsü asoshi Forensic Science Laboratory ka yangluba nung India-i yariteptsü melungogo.