Maharashtra nunga aluyimertem dang sentsüh atoktsüa akok

Mumbai, April 05 (TYO): Yashi Chief Minister, Yogi Adityanath-i aniba Uttar Pradesh sorkari state nung aluyimertem dang sentsüh atoktsü telemtetba agiba sülen Bodhbarnü Maharashtra Chief Minister, Devendra Fadnavis-i, UP nung aluyimertem dang sentsüh atokbaji asadanga state nunga kasaji inyaktsü merangtsü, ta metetdaktsü.
Assembly nung jembidang Fadnavis-i, “Iba sen atema Uttar Pradesh-i koma inyakdir ibaji onoki shisadangtsü,” ta ashi.
Shiv Sena-ia Maharashtra sorkar dang, sensaker aluyimertem dang sentsüh atoktsüla, ta takhangba agüja lir.
CM-i ashiba agi, pai State Finance Secretary dang UP-i aluyimertem dang sentsüh atokba indangji shisadangtsü tuyuogo.
Tamil Nadu nung High Court-i state sorkar dang aluyimertem dang sentsüh atoktsü tuyua liasü, aser iba dak sentakba nung Fadnavis-i, “Aluyimertem dang sentsüh atoktsü atema telemtetba agitsüji state melung,” ta ashi.
Fadnavis-isa, “Sena aser BJP züngsemtemi aluyimertem dang sentsüh atoktsü atema akhangbaji tim dang, aser state sorkara kasa tangatetbaji lir,” ta ashi.
Fadnavis-isa, “Onoki Centre dang senotsü teyari meshiogo. Onoki Centre dang nungi teyari mengura, sentsüh atoktsü atemaji shisadangtsü,” ta ashi.
Tanep assembly tenzükli Speaker, Haribhau Bagde-i tasüngdangbatem benoktsü atema mapang lapoktsü, iba sülen Shiv Sena aser BJP züngsemtemi aluyimertem dang sentsüh atoktsü atema benoka liasü.
Shiv Sena nungi Shamburaje Desai-i, “Uttar Pradesh-i sentsüh lakh ka tashi atoktsü atema sen crore 36,000 lemzüktsüteter süra Maharashtra-ia ibaji inyaktettsüla. Uttar Pradesh dang nungibo asenok senotsü jenjang tajungba lir. UP Chief Minister-i Centre dang nungi teyari mata,” ta ashi.
Desai-isa, April 7 nü Budget senden metembangdangsa Maharashtra nung sen crore 30,500 loan ji atoktsüla, ta ashi.
Ano Shiv Sena nungisa Subhash Sabne-ia, Parbhani nungi aluyimertemi June 1 nungi alu nung metsüh meyoki longkak aittsü sentong lir, ta ashi.
Paisa, “Aluyimertemi longkak aita alu nung metsüh meyokra asenokbo miim aketba süngjang dang achitsü asü?” ta asüngdanga liasü.