Rara aliba linük 6 nung India nung 24,000 lir

New Delhi, April 05 (Agencies): Iraq, Syria aser Afghanistan linüktem densema rara adoka aliba linük trok nung India nunger 24,084 lir, ta tanü sorkari Lok Sabha nung metetdaktsü.
Lok Sabha nung Minister of State for Foreign Affairs, General V K Singh (retired)-i, tang tashi India nunger 11,000 shi Iraq nung lir, India nunger 8,000 shi Lebanon nung lir aser Afghanistan nung 3000 jungnüa lir, ta metetaktsü.
Bendang linük balala nung India nunger apuba dak sentakba nung tasüngdangba ka langzüdang Singh-i, ministry-i anguba osang nung ajemdaker, 2015, 2016 aser 2017 kümtem (tanü tashi nung) India nunger 27 puer ao, ta ashi.
2016 küm nungi tang tashi Yemen nung India nunger kabo pua lir, parnok 25 chiokogo aser aser ka süogo, ta minister-isa metetdaktsü.
Ano tasüngdangba balaka nung Non Resident Indians (NRIs) kibongtem nung mangatettep ken otem dak sentakba tasüngdangba ka langzüdang External Affairs Minister, Sushma Swaraj-i, 2014, 2015, 2016 aser 2017 küm tashi nung item ama ken o 2,485 lir, ta metetdaktsü.