China linük anema India-i ni kodanga mamshi: Dalai Lama

Bomdila, April 05 (Agencies): China anema India-i Tibet nunger tamangba yimsü lenir, Dalai Lama amshir ta osang prokba dak sentakba nung tanü pai, China linük anema India-i ni kodanga mamshi, ta metetdaktsü.
Arunachal Pradesh semdangtsü atema India-i Dalai Lama nem temelaba agutsüba atema China-i ashishia liasü.
Dalai Lama-isa China dang, par lima aser China naprong tangatettep nung tajangzük angutsü atema Tibet nem tashi agüjang, ta ashi.
“Tibet nunger Buddhists timbaka China nung lir. China nunger shisashir aikati onük (Tibet) onük pusemer,” ta pai osangbenertem dang ashi.
“Onoki nüjiso memeshir. Onoki People’s republic of China densa liner. Tibet ya rongsenkettsüng nung tesülen atsüngzüka lir, saka tanela tsütsübo kanga tejaklen lir. Onoki China densa densema aliba ajanga rongsenkettsüng jenjang tajungba kümner, aser arok tajangzük angutsü atema China-ia iba tangatetbaji alitsüla,” ta pai ashi.
Dalai Lama-i Arunachal Pradesh semdangba atema Bodhbarnü China-i India anema longkak aitba anogo ka nung pai item o jembiogo.
Tanü China yimtiba, Beijing nung Chinese foreign ministry otongdar, Hua Chunying-i, Dalai Lama-i Arunachal Pradesh semdangbaji China-i anemer aser Beijing-i iba atemaji India ketdangsertem den jembitsü, ta metetdakja liasü.
Iba onük nung China-i Beijing nung Indian Ambassador, Vijay Gokhale ajurua jembiogo.
Mongolbarnü India-i, Dalai Lama-i Arunachal Pradesh semdangba ya yimtenren onük ka mekümdaktsütsüla aser China-i India linük telung onüktem nung mejangjongtsüla, ta jembia liasü.