Sen 2,000 notes anentsütsü tebilemba mali: Kiren Rijiju

New Delhi, April 05 (Agencies): Tang tamshidak sen 2,000 notes magila akumtsü ta olulu prokba dak sentakba nung tanü sorkari, sen 2000 notes anentsütsü tebilemba mali, ta metetdaktsü.
Tanü Rajya Sabha nung Minister of state for Home, Kiren Rijiju-i, “Onoki sen tailatem pudar. Olulu prokba nung mamangtsüla,” ta metetdaktsü.
Question Hour mapang nung Congress züngsem, Madhusudan Mistry-i, sorkari sen 2000 notes anentsütsü sentong ali asü? kechiyong market nung iba sen anentsütsü ta jembidar, ta asüngdanga liasü.
Minister-i, sen tailatemji timbaka Gujarat aser West Bengal na nungi apu. “Sen tailatemji mereprangteter ta jembibaji tiyazü,” ta paisa ashi.
Demonetization sülen market nung sen taila amshi tenzük, kechiyong iba atema ‘low quality paper’ amshi. Ajisüaka tesülenbo sen taila notes paper tajungba nung menüng tenzük, ta Rijiju-i ashi.
Sen notes tasen nung sorkari security features tasen aika inokogo ta shia Rijiju-i, “Tangbo shingaia 100 shilem shitak meyanglutettsü ta ni senden züngsemtem aser linük nüburtem dang ashir, kechiyong sen tasen nung indigenous design aser extra features lir,” ta ashi.
Sen taila nokdangtsü atema sorkari mera aika agiogo, aser sen taila amshirtem ozüng takhang agi merenshitsü, ta paisa ashi.
Demonetization sülen Border Security Force-i Assam aser West Bengal na nung sen 2000 notes taila 378 apuba osang Rajya Sabha nung metetdaktsüogo.
Ano National Investigation Agency (NIA)-ia Gujarat aser West Bengal na nung sen 2000 notes 22,677 puogo.