Dimapur Police-i HSRP tim mesüi amshir nisung ana apu

Dimapur, April 05 TYO): High Security Registration Plate (HSRP) tim mesüi agutsüba (issue) aser taila registration garitem nung amshiba maparen ka Dimapur Police nung Anti Vehicle Theft Squad (AVTS)-i kaktetogo, ta tanü ADCP / PRO Dimapur Police-i sangdong ka ajanga metetdaktsü.
District Transport Office nung register asüba gari ajak nung HSRP amshitsüla, aser HSRP ya contract company, SHIMNIT-i supply asür.
Iba company Headquarters ya Mumbai nung amenoka lir saka Dimapur nunga DTO, Dimapur den ‘attach’ süa branch office lir.
AVTS-i taila registration ken o kar bushisüngdangba mapang nung iba miim mapa ya jungkai adok, aser iba dak sentakba nung tang tashi nung nisung ana puogo; HSRP nung taila registration keter gari aika alitsüa akok ta bushitetogo, ta sangdong nung shia lir.
Tang pua aliba nisung anaji- tang 4th mile, Dimapur nung telidak aser Touphema village, Kohima nungi Zaneituo Sanchu’er jabaso, Neisakholie Sanchu lir aser pa ya SHIMNIT Company nung inyaker ka lir; ano kaji tang Kuda Village, Dimapur nung telidak aser Darjeeling nungi Santapir Thapa’er jabaso, Sanjay Thapa lir, aser pa yaa taoba mapang SHIMNIT Company nung inyaker ka lir.
Tang Dimapur Police-i iba ken o nungsa densema alir tangartem aser HSRP taila registration bushisüngdangdar. Iba mapa ya security alema lir aser police-i tim department dena tongtepa inyaktsü, ta Dimapur Police-isa metetdaktsü.