UP sorkari college nung jean aser T-shirt asemtsü nokdanger

Lucknow, April 5 (Agencies): Sorkar office balala nung cigarettes aser gutkha achiba nokdangba sülen, Uttar Pradesh Chief Minister Yogi Adityanath-i state ajunga nung college tem nung sobusolemba yimya bentettsü asoshi Directorate of Higher Education nem tetuyuba agütsü.
Osang ajanga ashiba agi, Uttar Pradesh nung government college 158 aser sorkari teyari agütsüba colleges 331 nung tesayurtem dang ‘Jean aser t-shirt’ masemtsü asoshi sorkar nungi tetuyuba agütsüa liasü.
” ‘Faculty’ züngsemtem aser ‘university’ ketdangsertem ajak mapang shidak nung kanga junga sobur arua pei mapa temolung agüja inyaktsü asoshi mepishir. Duty mapang nung jean aser t-shirt tem asemtsü memelar,” ta March 31 nü Directorate of Higher Education nungi osang ka prokshi.
Iba osang nung higher education joint director Urmila Singh indang ‘signature’ keta liasü. Maneni government college ajunga nung ‘attendance’ aser mapang shidak amshia mapa inyakba jangjatsü asoshi ‘bio-metric system’ amenloktsü, ta metetdaktsü.
Yogi Adityanath-i aniba sorkari sorkar office, school aser college tem nung moko, pan masala aser gutkha achiba nokdangba den iba mapa ya mesüktepa lir.