Google ajanga India nunger asoshi YouTube balaka sayatsü

Bengaluru, April 05 (Agencies): India nung internet junga maliba tesem nung amshitsü asoshi Alphabet Inc indang Google-i YouTube app tasen ka sayatsü.
India nung video tem agizüka yur network maliba mapang reprangtettsü aser data amshiba reprangtsü akokba indang YouTube Go sayar Google ajanga tetendangba balala agiba mapang ka lir.
India nung YouTube Go ya Google Play Store nung ‘Beta version’ bo sayaogo aser tanüngba shishilembaba tesemtem nung yakta sayatsü, ta company ketdangsertemi ashir.
India nung Reliance Industries Ltd indang Reliance Jio amenokba sülen danga company tem indang data plan nung jenjang tajemba kümdaktsüba ajanga video reprangba nung data tali agir timba kümogo.
India nütsüng billion 1.3 aser internet tesendaktep majungba ajanga iba amala app tasen yanglutetbatem ya India nung tendangtsü asoshi Silicon Valley indang nükjidong liasü.
Internet majungba ajanga video kanga meilongi load sütetba ajanga nüburtem tezü atangere, aser iba ajanga ‘slideshow’ ama video nung aliba noksatem aser olatem sayutsü asoshi YouTube ajanga sentong tasen ka yanglu. saka India nung YouTube amshirtemi iba sentong tasenba mesabu.
Tang tasenba design ajanga nüburtemi data tajemba amshia video reprangtsü asoshi yanglutet. Iba sentong tasenba ajanga nüburtemi video download masüdang ‘preview’ süteter.
India nung Reliance Jio amenokba ajanga internet amshia video repranger timba kümogo.
“India nung mobile amshir million 180 lir aser mobile nung video reprangba mapang ya küm shia shilem 400 agi timba akümer aser India nung YouTube ya sabua amshir,” ta YouTube ketdangsür, Jay Akkad-i osangbener dang ashi.