Manipur nung ILPS takhangba agüja kaketshir 5-i lumia lungkak aiter

Imphal, August 16 (Agencies) : Hokolbar nungi Manipur nung Inner Line Permit System (ILPS) mapa küma tenzüktsü takhangba agüja kaketshir pungui lumia lungkak aittsü tenzükogo.
Lungkak aitertem rongnung tetsür ka dena lir aser parnok ajak ya Imphal nung aliba Higher Secondary School balala nungi lir.
Manipur Chief minister Ibobi Singh-i, August 15, 2015 matongdang Drafting Committee ajanga ILP Bill tasenba indang mapa metembangtettsü ta osang metetdaktsüba sülen kaketshir pungu jagi lumia lungkak aittsü tenzük.
Joint Committee on Inner Line Permit System (JILPS)-i August 15, 2015 tashi nung sorkari ILP Bill mapa küma tenzüktsüla ta anogo latetja liasü.
Kaketshir pungupronglaji Class XII nung azüngertem lir aser parnoki Ananda Singh Higher Secondary Academy, Nongmeibung kima anepdang 7:00 ako nungi lungkak aittsü tenzük.
Parnok ya Ananda Singh Higher Secondary Academy nung azünger Surjit Sagolsem, Oinam Suresh aser Dayananda Lairikyengbam, Ibotonsana Girls’ Higher Secondary School nungi Nongmeibung, Loitongbam Bidyalaxmi aser Lamlong Higher Secondary School nungi Thoudam Mukhesh nungertem lir.
Manipur sorkari lisopur kümzüka ayutsü atema ILPS mapa inyaktsü asoshi temulung magütsüba agi par pungui lumia lungkak aittsü telemtetba agi.
Manipur nung lisopurtem kümzüka ayutsü atema Sapam Robinhood-i taküm bendanga agütsüba den külemi parnokia iba lumia lungkak aiter, ta kaketshirtemi ashi.
“Onoki akhangba ama mapa meinyak tashi lumitsü” ta parnokisa shisem.