Tanü putu nung computer shisatsü nüngdaker: Thongwang

April 5, 2017 nü Advisor, DUDA, LM&CP & NIDC, N. Thongwang Konyak-i Totok Chingha Village Local Ground semzüktsüba sülen tangokba noksa ka angur. 

Dimapur, April 06 (TYO): April 05, 2017 nü Mon nung Advisor, DUDA, LM&CP and NIDC, N. Thongwang Konyak-i IT for masses & digital India kübok IT ajanga state kübok backward districts pezü nung STs, lanurtem aser tetsürtem nem tashi agutsütsü atema skill training tenzüktsüogo.
Tang putu nung computer shisatsü nüngdaker, ta shia Thongwang Konyak-i, iba programme ya ajanga backward district pezü- Mon, Tuensang, Kiphire aser Longleng nem angati computer centres agutsütsü, aser district headquarters nungji computer skills sayutsü, ta metetdaktsü.
ICT skill training ajanga Eastern Nagaland nung lanur aser tetsür 1280 nem tashi agütsütsü atema sorkar sentongtem paisa metetdaktsü.
Okila jembidang NEILIT Director, Er. Lanuwabang-i, iba programme nükjidong ya eastern Nagaland nung backward tribes libaliro jenjang lenla ajaklen ajungkettsütsü, aser school azünger lanurtem aser tetsürtem nem technical skills agutsütsü atema lir, koba ajanga mapa maongka angutsü aser lanurtemi Information Technology tsütsü ajangzüktsü, ta metetdaktsü.
Paisa, iba programme nükjidong ya IECT courses nung backward district pezü nungi lanurtem aser tetsürtem nem training agutsütsü atema lir, ta ashi.
Iba programme tenzükba sentong nungsa Mon Deputy Commissioner, W.Honje Konyak aser Konyak Union Tir, S.Manlip Konyak natia jembia liasü.
Iba sentong ya DUDA Director, K.S.Anden Konyak lenisüba nung agia liasü.
Iba sentong ya Directorate of Under Developed Areas (DUDA) Government of Nagaland den National Institute of Electronic & Information Technology (NIELIT) Government of India-i ayongzüka liasü.
Ano tanga osang ka nung, April 5, 2017 anogo nungsa Advisor, DUDA, LM&CP & NIDC, N. Thongwang Konyak-i Totok Chingha Village Local Ground semzüktsüogo. Iba sentong nung jembidang N. Thongwang Konyak-i nüburtem dang iba ground tajungtiba nung anepalua amshitsü, aser iba asaya moapu nungi saisaponger tajung adokdaktsütsü ayongzüka liasü.
Kasa sentong nung DUDA Director, K.S. Anden Konyak aser EAC Aboi, Samuel natia o tatsütsü jembia liasü.
Iba sentong tembangba sülen Youngsters FC aser New Castle FC na tsüngda Aoleang football final asaya tenzüka liasü.