Nagaland asoshi Japan-i India nem sen crore 400 aputsür

New Delhi, April 6 : Japan International Cooperation Agency (JICA)-i Nagaland nung arem wazüka ayuba sentong tenzüka inyaktsü asoshi India government nem “Official Development Assistance (ODA) Loan” Japan nunger sen Yen million 6,224 (India sen crore 400) aputsütsü asoshi tezüngzüktepba ken o ka renmogo. Ibai “Nagaland Forest Management Project” asütsü sen aputsüba nungji mapa inyaktsü apuba nung sendem 0.3% asütsü aser consulting services interest rate-bo 0.01% dang asütsü. Iba sentsüh ya küm 40 nung aotsü.
JICA-i yaria inyakba mapa yagi Nagaland nung arem lendoka ronger alu ayimba melena arem meyitetdakja yang nung jagi parnoka tajangzük angutsüsa sentong kar yanglua inyaktsü.
Iba mapa tenzüka inyaktsü asoshi “agreement” ka Wb. Takema SAKAMOTO, Chief Representative, JICA India Office aser Wb. S. Selvakumar, Joint Secretary, Department of Economic Affairs, Ministry of Finance nati sign süa renemogo.
Iba sentong nung jembidang, Takema Sakamoto-i ashiba agi, JICA-i Nagaland nung nübortem sensak tia nungi aniteta taküm tajungba lia aotsü asoshi sentong tasen kar atonga inyaktsü ta metetdaktsü. Iba sentong jagi Nagaland nung arem rongdoka aluyimba melena süngjanglu aser süng atsüktsüba süng tema arem meyitetdaktsütsü ta paisa ashi.
Iba sentong nung “Forestry Interventions & Biodiversity Conservation”, “Livelihood Improvement & Community Development” aser “Institutional Strengthening” mapatem alitsü aser item project-temji Division 11 nung Forest Range 22 kübok yim 185 nung alu ha 80,000 nung inyaktsü.
Nagaland state nung 2013 nungi 2015 küm tashi nung alu ayimba ajanga arem aliba alushi kilometer 78 samaogo. Naga nunger tekong lu ayimertem 60% shi lira ser parnoki parnok tebok nüngdakjia 60 % dang bushitetter, anungji tang Japan nunger teyari ajanga tenzükba sentong ajanga tekong lu meyimi taküm tajungba lia otettsüsa inyaktettsü.
Iba sentong ya mapa küma inyaktsü purji Nagaland government kübok Environment, Forest & Climate Change department asütsü.