Dr. Shurhozelie-i Senayangba GHSS pur science & administrative ki lapoktsü

Mokokchung, April 6 (TYO): Nagaland Chief Minister Dr. Shürhozelie Leizietsü-i Brihostibarnü Ungma yimdak aliba Senayangba Govt. Higher Secondary School pur Science cum Administrative building ki tasen ka meraketa lapoktsüogo.
Tanü Shurhozelie-i tongti tesemdanger o jembidang, talangi oa azüngtsübaji ajakibo makoker, anungji, iba ama asen atep nung riju tajung lapoker nüngdakbatem agütsüba maongka ya ajaki agitsüla aser iba ajanga rongsenkettsüng nung kanga kümzüktsü, ta ashi.
“School tajung ka akümtsü aser chijiba education angutsü asoshi school ketdangsüri anir tesayur, staff-tem, tsürabur aser nübur ajaki amalitepa inyaktsübaji kanga tongtibang lir,” ta paisa inyakdaktsünüba olen ka ashi.
“School building tajung ka yangertetba amaji tangar school-tem asoshi tatishitsü ka südaktsütsüla,” ta paisa ayongzüka liasü. Dr. Shurhozelie-isa pa aruba temaitsü Senayangba GHSS nung hostel ka yanglutsütsü, ta metetdaktsüogo.
Senayangba GHSS ya 1972 küm Ungma Senso Mungdangi achayanga high school ka ama anepalua lapok. Aji sür, 1985 küm Govt-i iba school agiadok. 2002 küm higher secondary amenok. Iba nung Class 7 nungi 12 tashi lir aser yangi secondary level Science o Arts stream na agütsür. Asür Senayangba ya Odisha Angh, Dr. S.C Jamir tebu lir.
Iba sentong nung SGHSS Principal Lakhi Longkumer menden liasü. Sentong nung Advisor to Urban Development S.I Jamir, Mokokchung ADC Sachin Jaiswal IAS, Ungma Village Council Chairman Alemtoshi Imsong, Ao Kaketshir Mungdang tir Imkongwati aser Mokokchung DEO I.Temjennaro parnoki tepela o den tajungshi o balala bener arua tesentepertem ayongzük. Iba building ya 2013-14 küm DoNER kübok Saramati Constructions-i sütsü.
Tanü iba sentong nung Dr. Shurhozelie den meina par külem medemer minister, advisers, parliamentary secretaries, MLA, party lenir aser sorkar tongti ketdangsür aika densema liasü.
Ungma yimdeni Dr. Shurhozelie tushia agizük :
Ungma yimdeni Nagaland Chief Minister Dr. Shürhozelie Leizietsü nem tetushi agüja Ungma Amphitheatre nung sentong tajung ka ayongzüka agizük.
Dr. Shurhozelie-i iba sentong nung jembidang, pa chief minister kümer külen mezüng yim semdangbaji Ungma yim ya lir aser Ungma nungeri pa jaokba asoshi pelaba metetdaktsü.
Paisa Naga nunger yimden tebilemtsü indang kar lemsatepdang, “iba tebilemtsü ya yimden (political problem) tebilemtsü lir, anungji, yimden tsütsü nungiang iba ya lemtettsü nüngdaker”. “Ibai meimchir tebilemtsü lir, anungji, meimchir tsütsü nungiang lemtettsü nüngdaker”, ta metetdaktsü.
“Naga nunger yimden tebilemtsü ya alima nung tebilemtsü talangtiba aruba rongnung ka lir. India sorkari Naga yimden tebilemtsü dak sentakba nung tongti mera kar agiba ya Naga nüburtemi süoki ia bilemdangtsüla”, ta paisa ashi.
“Mezüng nung Naga political movement ya ka sür tenzük, saka tanübo telok aika kümogo”, ta temulung shirangba o ka ashi. Paisa iba dak sentakba nung ashidang, “India sorkari Naga yimden tebilemtsü ya teti asoshi telatetba ka dangi bener arutsü merangdang, telungpur telok ajak ka küma lungjemtsüla”.
“Lungjemtsü asoshi lokti nung ayimdenba jagi telungjem kecha bener marutsütsü, anungji, telungjemji asen kidang/atep nungi tenzüktsüla”, ta paisa tayongzükba ka agütsü. “Naga nungeri aroka bilemdangtsüla aser Ungma ama yim tulutemi anir telungjem maparen nung tongti shilem agia tenzüktsüla”, ta paisa shisem.
“Asenok joko talangka shiranga aruogo, joko asen chirtembo iba amai meshirangdaktsünür, ta paisa ashi. Keno tila-teri nung rarabangsen mesüli saka asen jakdang aliba Naga yimden tebilemtsü tulu lir, anungji, tarutsü putu atema bilemtsüla” ta paisa ayongzüka liasü.
Iba sentong nung Imtidongba tatar (Aola), Minister Imkong L Imchen, Adviser to CM Huska Yepthomi, Adviser to CM Apong Pongener, Parliamentary Secretary Imtikümzük parnokia mapang tatsütsü agia shilem agia jembi.
Sentong nung Shilubenla & sister’s telok ken tajung ka aten aser Ungma nung aliba Young Naga Club, United Suyim Club aser Kongshir Longtrok Senden teloki sobaliba yar tsüngsang ken balala ia sayu.