Ram tekülem ki atemabo jail-ia aitsü: Uma

Lucknow, April 08 (Agencies): Honibarnü Water Resources Union Minister, Uma Bharti-i, Ayodhya nung Ram tekülemi ki yanglutsü atemabo lai tepuokdakia aitsü melunga lir, ta ashi.
Uttar Pradesh chief minister, Yogi Adityanath ajuruba sülen Lucknow nung osangbenertem den jembidang BJP lenir, Uma Bharti-i, “Ram tekülem kiji kü atema tamang lir aser ni iba nungji nüma atanger. Iba atema jail-ia aitsü ni melunga lir, iba atemaji ni alenseta asütsüa melunga lir,” ta ashi.
Yogi den senden amendang Ayodhya nung Ram tekülem ki yanglutsü onüka jembir asü? ta asüngdangba langzüdang Uma-i, “Küna Ram tekülem ki atema jembitsü menüngdak. Küna (Uma aser Yogi) atema iba ya onük tasen ka masü. Iba tekülem ki yanglutsü mapatong nung Yogi’er tesayur, Mahant Avaidnath lenir liasü,” ta ashi.
Union minister-isa, “Iba onük ya tang tashi Supreme Court nung anendaka lir anungji ni iba dak alia mejembitsü, ajisüaka Supreme Court-i iba onük ya court adener tangatettep nung bentettsü akok ta shiogo,” ta metetdaktsü.
Ayodhya nung Babri Masjid raksatsüba ken o nung Uma Bharti den L K Advani aser MM Joshi densema BJP lenirtemi tasa tamajung yangluba atema parnok anema ken o akatsü asoshi tawa Supreme Court nung temepishiba ka benoka lir.