Aluyimertem sentsüh atoktsü: Amarinder

Chandigarh, April 08 (Agencies): Honibarnü Punjab Chief Minister, Amarinder Singh-i, par sorkari aluyimertemi loan agia aliba sentsüh atoktsü atema inyaktsü; Centre sorkari teyari agüjaka magüjaka parnoki sentsüh alir aluyimertem atema lenmang bushitsü, ta metetdaktsü.
Zirakpur nung ‘D-Mart’ store ka lapoktsüba sülen osangbenertem den jembidang Chief Minister-i iba o ya jembia liasü.
Pai ashiba agi, aluyimertem dang sentsüh atoktsü atema state sorkari Centre ajurua teyari meshiogo.
“Onoki Centre dang nungi teyari menguaka aluyimertem sentsüh khuret pungbatsü atema inyaktsü aser iba atemaji maparen tenzükogo,” ta pai metetdaktsü.
Congress sorkari election manifesto nung nangzükba ajak ataloktsütsü, ta pai ashi.
State nung temesepba mozü tebilemtsü atema inyaktsü ta election mapang nung nangzükba dak sentakba nung Singh-i, iba tebilemtsü atema state sorkari STF tentetogo aser parnoki iba atema inyakdar, ta metetdaktsü.
Pai ashiba agi IPS officer, Harpreet Singh Sidhu leniba nung STF-i kanga meranga inyakdar, aser kobi melii iba tebilemtsü koktettsü.
Paisa, kobi melii sorkari state rongsenkettsüng indang ‘White Paper’ ka adoktsü, aser ibaji ajanga taoba Shiromani Akali Dal (SAD) sorkari state rongsenkettsüng raksatsüba jungkai adoktsütsü, ta ashi.
Shiromani Akali Dal (SAD) aser BJP-i tesüiba küm 10 tashi state yimsüsüa liasü, aser taoba ita assembly election nung Congress-i parnok atsüngdok.
Ano tanga tasüngdangba ka langzüdang Singh-i, ozüng alema lisem atuba nokdangtsü atema sorkari inyakyim ka tenzükogo, ta ashi.
Paisa, kobi melii ‘mines’ tenet yokdoktsü, iba sülen Punjab nung lisem aser gravel jenjang ajema akumtsü.
D-Mart store lapoktsüba sentong nung jembidang CM-i, company-i state nung store 10 lapoka idakji sen crore 500 jungnüa invest asutsü aser lanur 1,000 shi nem mapa agutsütsü sentong aliba atema tenüngsang aguja liasü.