Mizoram nunger Michael M Sailo süogo

Aizwal, April 8 (Agencies): Mizoram nunger nüngtugu rap kentener, Michael M Sailo Hokolbar aonung bike tsükokba lendong ka nung densema süogo.
Michael M Sailo shiba dang ‘Aceman’ ta-a aja, pa ya kanga dang sempet aketba kentener, ken mejemer aser music mejemer ka liasü. Osang ajanga ashiba agi, pa yasüng 11:45 meta bike nung tsükoka tekolak yiruba ajanga asü.
Sailo ya Mizoram nung nüngtugu rock telok ‘Scavenger Project’ nung züngsem ka liasü. Par telok ya northeast aser linük nung tesem balala aika nung kentenba sentong balala nung shilem agia liasü. Pa maneni Independence Rock, North East Beat Contest amala tetoktepba aser sentong nung par telok den shilem agia takok ngua liasü.
Michael-i pa kinungtsü aser jabaso ana toktsür iba lima nung pilaogo.
Northeast tesem balala nungi Facebook aser Twitter ajanga nüburtemi asüku lemsatepa liasü.
Michael ya Aizawl mesüra Northeast India nung ‘Hip Hop’ ‘pioneer’ ta ashitsü akok. Pai rap sütetba den külemi kentenba, dj, produce aser record asüba nung sempet kanga dang tajung aketba nisung ka liasü. 2017 tashi nung pai kensep ana tashi produce süa liasü.
Michael taküm aliba mapang nung award aika ngua liasü, item rongnung Best Rapper, Lelte Award aser Best New Artist Rimawi Khawvel Award tem lir. Pai produce asüba aser külemi longjemer inyakba ajanga artist tasen aika ajungketta liasü.
Maneni pai India nung tongtibang yimti timba ka nung kija aser par telok den kentenba sentong balala nung shilem agia aruogo, aser North East nung pa sapur jenti lir.