Dimapur nung Lok Adalat agi

Dimapur, April 08 (TYO): Dimapur District Legal Services Authority (DDLSA)-i parnok indang Common Action Plan dak sendakba aser National Legal Services Authority (NLSA) tetuyuba nung ajemdaker tanü Banks recovery kenotem aser tanga ken otem nung National Lok Adalat kaogo.
Chief Judicial Magistrate aser DDLSA Secretary, Ajongba Imchen-i ketdangsüa Dimapur District Court telongtet nung National Lok Adalat kaa liasü.
Okila tatsüka jembidang Ajongba-i Lok Adalat ya alternative dispute resolution ka lir aser iba ya kanga tongtibang, ta metetdaktsü.
Pai ashiba agi, ken o tem aika bentetba ajanga ken o aika bendena aliba ajema akumer aser ‘client’-a ajangzüker.
Lok Adalat ya ajanga nüburtem nem maongka agutsür aser tekaraba nung sen meintoki obendang angur.
Lok Adalat ajanga ken o 15 bentet aser iba nungji sen 7,12,220/- (sen lakh tenet, meyirjang terana, noklang ana ser metsü) sendaka liasü.
Lok Adalat nung shilem agiba atema DDLSA-i bank tem, Conciliators, Lawyers aser nüburtem dang pelaba lemsatepoogo.
Iba den külemi nüburtemi maongka agia Lok Adalat nung ken otem bentettsü atema ajungshiogo.
Taruba National Lok Adalat ji taküm June ita nung akatsü.
Osang taliba jangjatsü atema Front Office, DDLSA, District Court, Dimapur nung tongteprateptsü akok.