Ajaki longjemer temelenshi bener arutsüla : Y. Vikheho Swu

Dimapur, April 8 (TYO): Asenoki temelenshi nüngdaker aser ibaji ajaki külemi adokdaktsütsüla saka asenoki khen nungdangbo meinyaktettsü, ta Roads & Bridges Minister, Y. Vikheho Swu-i ashi.
Honibarnü DABA Duncan nung aliba Elim Hall nung “Clean Election: Framing the issues in Nagaland” indang onük jembidang Vikheho Swu-i “asenok tangatetba melenshitsüla” ta ashi.
Iba sentong ya The Morung for Indigenous Affairs and JustPeace-i ketdangsüa agiba 8 buba Morung Lecture series nung shilem ka liasü.
“Nisung ajaki temelenshi bener arutsü atema merangtsüla. Yimsüsürtem kijai temelenshi bener marutet. Loktiliba nung nisung ajak nungi temelenshiji adokdaktsütsüla. Tanü asen state nung tensa atema ajaki tebilemtsü abentsüla aser asenoki asen chirnurtem nem loktiliba tajungba ka agütsütsü atema merangtsüla” ta Vikheho Swu-isa ashi.
Election ochishia agira, Naga nunger taküm nung temelenshi jenti adoktsü. Election ochishia agitsübaji asenok ajak atema tayongzükba ka lir. Asenoki tamasa election ya kechi atema agir’ar angatettsüla aser memetetertem dang küm pungu shia election agiba indang angatetdaktsütsüla, ta paisa shisem.
“Temelenshi bener arutsü atema langka tetenzükdak ka alitsüla, clean election atema tetenzükdak ka alitsüla. Nübortemi election kechiba agir’ar angatetba sülen loktiliba nung temelenshi tajung jenti adoktsü. Tangatetba aruba sülen nübortemi parnok tangar nem manishidaktsütsü mesüra mashilen tangatetba sülen anir moudaktsütsü” ta Swu-isa metetdaktsü.
“Yimtenren teloktemi clean election agitsü lemtetba sülen dang iba ya asangsang nung ataloktsü anungji yimtenren teloktemi iba nung shilem agitsüla. Iba ya taoba clean election campaign nung matalok” ta paisa ashi.
“Tang tagidak clean election campaign nung nisung aser telok aikati shilem agiba angudang ni tali ajungmesor. Media dena, kin, constituency aser kaketshir telok kari shilem agiba atema pelar. Iba maparen nung telok talila dendaktsütsü atema asenoki sentong atongtsüla” ta Swu-isa ayongzük.
Tanü agiba sentong nung lawyer Hekani Jakhalu-ia Post Election Watch Election Expenditure 2008 & 2013 indang jembi aser lai slide presentation ka ajanga elections nung sen endokba indang osang tejangja metetdaktsü.