Kohima Watsü Telen-i NHAK nem tenla agütsü

Dimapur, April 8 (TYO): Kohima Watsü Telen-i ‘Taküm Ka Kümzükang’ omen nung ajemdaker Naga Hospital Authority Kohima (NHAK) nem tzü tajemtsü system unit 10 tenla agütsüogo.
Kohima Watsü Telen-i tenla agütsüba drinking water system ji NHAK nung ward balala aser entrance nung yuja lir aser tanü NHAK Managing Director, Dr. Neikhrielie Khimiao-i semzüktsü.
Hospital nung drinking water system kanga nüngdaka liasü aser ibaji Watsu Telen-i asangsang nung ataloktsüba atema kanga pelar, ta Dr. Neikhrielie-i ashi.
Sentong nung KWT züngsem, Watienla Jamir-i o jembidang, “KWT-i loktiliba nung tetsür temeten atema mapa inyaker. Iba dak alia onoki loktiliba asoshi maparen balala inyaker aser iba nung drinking water system tenla agütsüba ya dena lir” ta ashi.
Iba ajanga NHAK nung shirangertem, semdangertem, yaritepertem aser staff ajak teyari angutsü imlar, ta laisa ashi.
Laisa, NHAK ketdangsertem dang drinking water system timi anepalutsü atema mepishia metetdaktsü.
Sentong nung mendenji KWT Chubasangla Longkumer liasü, Kohima Ao Baptist Arogo, sannüker, Tiatoshi Longkumer-i meshiteta sarasademtsü aser Naga Idol Season 3.08, Toshinaro Imchen-i ken tajung ka aten.