Egypt:Tenla kidang bomb apokdang nisung 21 asü, 59 yiru

Cairo, April 9 (Agencies) : Egypt kübok Tanta yimti nung Coptic Khristan Tenla ki ka nung Palm Sunday sentong tagidak mapang bomb lendong ka atalokdang tajemba agi nisung 21 asü aser 59 yiru, ta Health Ministry sangdong ka ajanga metetdaktsü.
St George Mar Girgis Tenla ki telung nung tejaklen laa aliba menden, teberem nendaktsü aliba menden ka kübok iba bomb ji yuja liasü, ta security temi ashi.
Iba lendong nung asürtemji ano timba akümtsü kechiba süra tang yirur alirtemji karbo tasü taküm tsüngda lir, ta sangdong ajanga metetdaktsü.
“Kiralongrartemi ano Egypt nung lendong agütsü tenzüker, aser ajia Palm Sunday anogo nung lir,” ta Foreign Affairs Ministry-i sangdong ka ajanga ashi.
Palm Sunday ya amangbapurtem asoshi temshitiba amungnü rongnung ka lir. Iba ya Yisu Khrista Yirusalem-i takok ngua aiba tenüng nung amunger.
Osangbenertemi ashiba agi, social media video tem nung lendong atalokba sülen nübur jenti Tenla Kima adenshiba inokja lir.
Iba lendong nung Tenla Ki indang jaraa pokdok, ta tenük kuli angurtemi ashi.
Linük Tir Abdel Fattah Al-Sisi-i, iba lendong nung yirurtemji military mozü kitem nung anir oa yaridar, ta ashi.
Lendong atalokba Tenla ki nung asürtem aser yirur alirtem yaritsü asoshi ambulance 26 tashi yoka liasü. Iba Tenla ki ya Cairo nungi kilometer 120 shi pilar lir, ta Ambulance ketdangser tekolakba Magdy Awad-i ashiba osangbenertemi metetdaktsü.
Iba sülen Tenla kitem ajak nung Security force tem sünga yokogo, ta Interior Ministry-i ashi.
Iba lendong ya shir teloki agütsüar ano shingaia tenüng magi.
Egypt nung aliba nütsüng yongsük noklang nung shilem 10 bo Coptic Khristan tem lir. Parnok küm noklang aika Muslim amangertem den yimjung nung lia arur.
2011 küm Hosni Mubarak Tir menden nung aluba sülen nungi Coptic Khristan tem rishi kangshiba kanga ataloker.
2016 December ita nunga Cairo nung Coptic Tenla ki ka amakdang nisung 25 asü.
“Parnok indang Tenla ki aser taliba ki aika mi agi rongtoktsüogo, parnok dak züka merenshir aser parnok rongsen auyaa bener aoer,” ta nüburtem temeten atema inyaker Amnesty International-i March ita nung metetdaktsüogo.
Tan ita Pope Francis-i Cairo semdangtsü sentong renema lir, aser pai yangji Coptic Orthodox Arogo nung lenir aser tamangba balala nung lenirtem den ajuruteptsü.