Nagaland ya moko achiba nung tanabuba jenjang nung lir

Kohima, Apr 10, 2017 : Nagaland nung alir tesadang ka dang nungi talii moko achir, anungji linük nung Nagaland ya moko achiba nung Mizoram sülen tanabuba jenjang nung lir ta GATS 2010 survey ajanga asadangtetogo ta District Nodal Officer (NTCP), Wokha, Dr Meribeni Odyuo-i metetdaktsü.
Iba osang ya lai Wokha nung tetsürtem den moko achiba ajanga timtem aruba indang tangatetba agüja jembidang metetdaktsü. Iba sentong nung lai COPTA Act 2003 indanga jembia liasü.
” Tangbo nisung aikati moko achiba ajanga temang nung tashidak adokba indang meteta kümdagi aser joko kilong aser kima temeket nunga moko mechidaktsüner aika lir,” ta laisa ashi.
Dr Meribeni-i ashiba agi, NTCP, Wokha ajanga school, arogotem aser yimtak yimtsüng aser town-tem ajak nung moko achiba ajanga timtem aser tashidak adokba indang jembitsü asoshi sentong renema lir.
Moko achiba ya mokozü alonga achiba ya dang masü saka mokozü madoki tebang nung anemba moko ajunga to dena lir.
Iba sentong nung Dr. Pithungo Kikon (MO, Wokha)-i jembi aser Kimiri Tungoe, Wokha District Legal Service Authority aser Abeni Kikon nati COPTA Act 2003 ozüng aser tetsürtem lokti nung shilem agitsü indang tangatetba agüja jembia liasü.