ACAUT-i ‘Transporters’ dang telongpur saru mesarutsü metetdaktsü

Dimapur, April 10 (TYO) : Tangalen nungi Nagaland-i osettsüset bener arurtem dang telong nung alirtem asoshi saru sarura, iba atemaji ozüng nung shia aliba ama police-i merenshitsü ta ACAUT teloki tekümdangtsü o ka metetdaktsüogo.
Telong nung alir telok kari osettsüset bener arur (Transporters)-tem dang bener marudang tamasayongi parnok asoshi tax meshia yutsütsü asoshi asüngdang, saka tsüngsem abenertemi ibajibo magütsütettsü ta ashiba agi, Baadmashi Tranporters o telongpurtem na tsüngda tangatettep ka yanglur, tsüngsem abenba carton shia sen Rs.150/- agitsü lemtet aser ibaji magütsü tashibo osetji mechioktsü.
Iba amaji inyakra, transporter ajungaji ozüng raksartem asütsü, kechiyong parnok nem carton shia latettsüba senji magütsüra oset kata mechioktsü, anungji iba ama inyakba mapa nungi tangbo pilaa alitsüla ta parnokisa metetdaktsü.
Nagaland nung telongpurtemi saru tali saruba ajanga maremteti Dimapur nung business inyakertemi Lahorijan aser Khatkatti nung dang kiojen yanglua Dimapur dangbo terenlokba renloka odagi, anungji Naga nunger yimten temeten bushiba mapa ya pei lima meimba agi rarar süra telongpurtem telok ajaki tang ya bilemdangtsü mapa ka südaktsütsüla ta ACAUT-isa metetdaktsü.
Iba ama ozüng raksaba mapatem ya Dimapur Police-i akok tashi reprangtsüla ta parnokisa metetdaktsü.