Nübortemi mokdangtsü apusoba agi PWD(NH) arakzüker

Kohima, April 10 (TYO) : Nagaland nung National Highway agi National Highway memesük kanga mejungi aliba lenmangtem rongnung Mon-Namtola lenmang ya ka asütsü.
Iba lenmang yabo gari lenmanga memesük küm aika government-i mangu ama toktsüba agi timtem marem Tizit Area Students’ Union (TASU) purtemi iba lenmang nung gari kata mesenzüdaktsüi mokdangtsü ta metetdaktsüba sülen, tanü Hombar nü Work & Housing department nung Commissioner & Secretary ajanga iba lenmang yanglu yakta tenzüktsü ta metetdaktsüogo.
Kasa sangdong nung, iba lenmang yanglushitsü asoshi tender maparen hopta anasemka nung renemtsü aser Chief minister-i iba lenmang yanglushitsü atema April 4, 2017 nü sen crore 4 agütsütsü nangzükogo ta paisa metetdaktsü.
Tizit- Mon area nung iba lenmang yanglushitsü asoshi tamalen contractor kar nem agüja liasü saka tang tashi meinyaki toktsüba kulitemji bushitsü aser yakta tenzüka inyaktsüsa reprangshitsü ta paisa metetdaktsü.
Anungji, TASU-i Mon-Namtola lenmang mokdangtsü lemteta aliba sentongji agiendaktsüner ta Commissioner & Secretary-isa mepishia metetdaktsü.
Ano, National Highway 2 Kohima nungi Mokokchung leni aoba lenmang nung Lotha aser Rengma nunger lushi kübok lenmang meyanglui nübortem timtemdaktsüba marem, Lotha Hoho aser Rengma Hoho natia April 18 yashi nung iba lenmang yanglushi metenzükra, lenmang ajak nokdanga longkak aittsü ta metetdaktsüba sülen, government tenüng nung PWD (NH) Chief Engineer-i iba lenmang yanglutsüba sentong indang metetdaktsüogo.
Nagaland nung Kohima Division kübok NH 61 nung Km 40 nungi 72.40 tashi 2-Lane küma ulushia yanglushitsü asoshi 2010 küm June 18 anogo nung Ministry of Road Transport and Highways (MORTH)-i sen lakh 9368.08 sanction sütsü aser iba mapa inyaktsü atema tender jaoker külen M/S Meenakshi Infrastructure Pvt. Ltd. telok nem iba mapa ya agütsü.
Ajisüaka, iba mapa agütsüba anema kari okadak keno benok aser okadak mapang talangka agiba ajanga MORTH-i iba mapa ya 2015 küm February 19 nü shibangtsü ta Chief Engineer-isa ashi.
Iba sülen ano yakta dang iba lenmang ya yanglutsü asoshi kasa lenmangji ulushia yanglutsü atema Engineering Procurement Contract (EPC) inyakyim nung inyaktsü atema MORTH ajangasa mapaji ana küma lemsar inyaktsü temelaba agütsü.
Kasa lenmangji ana küma inyaktsü lemdangtsübaji Package I – nung Km 40.00 nungi Km 56.00 tashi aser Package II nung 56.00 nungi Km 72.40 tashi liasü.
Iba mapa atema tender agütsüba mapatem ajak January 20 nü lapok. Ajisüaka, Package I mapa agütsüsang nungi telangzüba kecha manguba ajanga kasa mapa atema ano khen Bids meshitsüla akümba ajanga mapa menua adok. Tang tender agüja allibaji reprangshidagi aser April tatemlenbo mapa ya agütsütsü amai lir ta Chief Engineer (NH)-isa metetdaktsü.
Package II nung aliba mapa atemabo “Letter of Acceptance (LOA)” march 31, 2017 nü agütsüogo ta paisa metetdaktsü.
Talisa tender agütsüba maparen ya February nung mokdangba sentong agi mapa meinyaktet hopta asem menudaktsü ta paisa metetdaktsü.
Tang contract mapa amato masü Engineering Procurement Contract (EPC) mapa asoshi tender agüja inyaktepdang mapa agir, ajisüaka item maparentem temerbo mapa inyak tenzüktsü aser lateta akaba mapang shitak nung renemtsü ta CE (NH) -isa metetdaktsü.
Nübortem timtembaji department-ia meteta lir, anungji nübortemi ano khen aremzüka iba mapa dak sendakba nung tender maparen temdaktsü atadaktsüner ta Chief Engineer PWD (NH)-is ametetdaktsü.