Kohima nung ‘Flower exhibition cum competition’ tenzükogo

April 11, 2017 nü Horticulture Department Secretary, Alan Gonmei IAS-i Heritage, Kohima nung NFGS exhibition cum competition lapoktsüdang agiba noksa angur.

Kohima, April 11 (TYO): Nagaland Flowers Growers Society (NFGS) indang ‘exhibition cum competition’ sentong ka Heritage Complex, Kohima nung April 11, 2017 anepdang 10:00 ako nungi tenzükogo. NFGS ajanga iba ama sentong ya 2014 nunga khen ayongzüka agiogo.
“Iba ama sentong ajanga state nung naro tsünürtem tali ajungshir aser tangar den tokteptettsü,” ta iba sentong lapoktsüba mapang Horticulture Department nung Secretary, Alan Gonmei IAS-i ashi. Paisa sentong ayonger dang pelaba shisem.
“Naro yakgi nisung taküm nung tongti shilem agir aser ibai tongtipang benjungmong, kiyimba benjung aser külemküjaba mapang amshir,” ta Secretary-isa ashi.
“India nung naro tsünüba aser naro lu ayimba ya kanga tongtipang kümogo aser shishilembabaren nung naro ya tongtipang ka kümogo. Iba ajanga sen lenmang lapoktsür aser iba yongji India sorkari narolu ayimba nung temolung agütsüshir,” ta Gonmei-isa shisem.
“Alima nung naro adokdaktsür rongnung China ya temaba jenjang nung lir aser India ya tanabuba jenjang nung lir. India nung ali tasazük hectare 2,33000 nung narolu ayimer, saka Nagaland nung naro tsünütsü ya tangar state dang temenuba tenzük,” ta paisa iba sentong nung jembidang ashi.
Iba sentong ya NFGS nung Assistant General Secretary, Meyievino Theluo-i ketdang süa ani aser NFGS tir, Akruzo Putsure-i tepela o jembi.
Iba sentong agiba sülen ‘exhibition hall’ lapok aser ‘high school level’ nung ‘fresh flowers arrangement’ tetoktepba ali.