Nagaland nung BJP government akümtsü merangtsü

Dimapur, April 11 (TYO) : April 06 ya linük nung BJP tenzükba anogo lir saka taküm küm asoshi teloki BJP tenzükba anogomong ya April 6 nungi 14 tashi amongtsü lateta lir. Iba mapang Lok Sabha BJP tatartem den BJP lenirtem ajak pei pei constituency-i aotsü aser lenirtemi tanga tesema semdangtsü lemtet, anungji Nagaland asoshia BJP National tongti zülur Kailash Vijayavargiya lemzükba ama pa arua BJP lenirtem den senden agiogo aser Mongolbar anepdang Dimapur nung pai anir Swachh Bharat sentong ayongzüka agiogo.
Mongolbar anepdang, Marwari Patti, Dimapur nung Swachh Bharat sentong nung jembidang, NDA government-i linük ajunga nung moapu nung metsümeshi kenyongi masütsü atema inyaktsü lemteta lir aser iba sentong nung urban aser rural area nung metsümeshidak (toilet) crore 11 yanglutsü sentong yanglua lir.
Linük nung iba sentong mapa küma inyaka aotsü atema senotsü sentong nunga sen crore Rs 1,46,000 enoka lir. Iba tangatetba nung Himachal Pradesh aser Sikkim-bo moapu nung kenyongi metsümeshi masüdak ‘open defecation free’ state ta sangdongogo.
BJP lenir Vijayavargiya ya yashi Dimapur tonga aru aser BJP lenirtem den senden mena liasü.
BJP lenirisa ashiba agi, pa Nagaland nung BJP tashi itshitsüba aru . Ato kilonser, Narendra Modi-i BJP lenirtem ajak dang nübortem alidak tonga oagi parnok nüngdak reprangtsü ashi aser terenlok mapatem shitak inyaka sensakertem teyari agur asü manguar asüngdangdang ta metetdaktsüogo ta Vijayavargiya-i metetdaktsü.
Tangbo Nagaland nung BJP tashimait saka taruba election nungbo Nagaland nung constituency 60 prongla nung BJP candidate yoktsü aser BJP government akümtsü merangtsü ta BJP lenirisa ashi.
Tawa parliament nung GST ozüng küma yanglutetba asoshi pelaba metetdaktsü dang, linük nüchiso ngur tangang “Kin ka, sarua ka” (One Nation. One Tax) asütsü tatar senden nung latettetogo ta BJP leniri ashi.