Myanmar nung telungpur amaker sepai 8 nem gallantry award agütsü

New Delhi, August 16 (Agencies): June 9, 2015 nü Myanmar nunger lushi nung Northeast telungpurtem amaker 21 Para (Special Forces) nungi commando ti nem 69 buba Independence Day amungtsü anogo ka jakdang sempet agütsüogo.
Iba mapa ya Lieutenant Colonel Nectar Sanjenbam lenisüba kübok inyak aser pa nem Kirti Chakra agütsü. Iba sempet ya India nung peacetime gallantry award tematibatem rongnung tanabuba lir.
21 Para (SF) nungi Havildar Tanka Kumar Limbu nem Shaurya Chakra agütsü aser commando tem – Major Prashant Yadav, Lieutenant Krishnan Kant, Havildar Chanar Singh, Havildar Raj Bahadur Tamang, Naik Manoj Kumar aser Naik Bhupinder Singh nunger nem Sena Medal agütsü.
June 4, 2015 nü Manipur kübok Chandel district nung telungpurtemi sepaitem amakdang sepai 18 khaset aser iba ya küm 20 sülen sepaitem tamajungtiba amakba liasü. Iba tatalokba sülen anogo pungu lir India nunger sepaitemi Manipur aser Nagaland arrtsü anasa Myanmar nung telungpur tesep ana amak.
Taküm Independence Day nüngtem nung Army, Air Force aser Navy nungi sepai 68 nem gallantry award agütsüogo.