ACAUT-i T.R.Zeliang aser Vikheho Swu na merenshidaktsüner

Kohima, April 11 (TYO) : T.R.Zeliang chief minister menden nungi alur külena pai chief minister ama ‘Chief Minister’s Road Development Fund (CMRDF)’ nungi 2016-17 küm atema inyaktsü asoshi shimtetba mapatem lemzüktsütsü atema sign asüba asoshi ozüng nung aliba ama pa dak inyaktsüla ta ACAUT teloki Nagaland Legislative Assembly Speaker dangi züluba shidi ka nung metetdaktsüogo.
State Government-i nübortem anema sentong yangluba ajanga municipal election magitettsüsa aküm aser T.R.Zeliang chief minister menden nungi aludaktsü aser pa melena February 22, 2017 anogo nung Dr. Shurhozelie Liezietsu chief minister aküm. Iba sülen T.R.Zeliang nem Advisor to the Chief Minister kümdaktsü aser cabinet jenjang nung Finance mapa lemzüktsü.
T.R.Zeliang Chief minister menden nungi alur külen March 8, 2017 nü pai chief minister ama “Chief Minister’s Road Development Fund (CMRDF)” amshia mapa inyaktsü agütsütsü purtem tenüng shimteta sign ser Vikheho Swu, Road & Bridges minister dangi yok. Vikheho-isa T.R.Zeliangji chief minister masüa ta metetsümonga kasa shidi nungji paia sign ser “to process for Tender” ta zülur CE (PWD) Road & Bridges dangi yok aser ksaji 11/03/2017 anogo nung EE-III dangi yok. Iba maparen nung T.R.Zeliang-i tai inyakba nung Vikheho Swu-ia inyakbaji ozüng anema lir, anungji ozüngi melaba ama inyaktsüla ta ACAUT telokisa metetdaktsü.
Aji oda, chief minister menden nungi alur külena T.R.Zeliangi chief minister ama inyakbaji pasasa pai aibelener asütsü aser ozüng nung aliba ama merenshitsüla ta ACAUT telokisa Speaker dangi züluba shidi nung metetdaktsü.
T.R.Zeliang ya Chief minister inyakba nisung dang masü saka mapang talangka yimsüsür menden nung mendangba nisung lir, pai ajak meteta aser ajangshidanga lir, anungji pa ama ka aibelendang memerenshiang medoktsütsüla aser kasa aibelen mapa asoshi Vikheho Swu nema tapet temerenshi agütsütsüla ta ACAUT telokisa speaker nem metetdaktsü.
Linük nung temzüng ozüng tsüngdangbo tulu tila kecha mali ajak kasasa asünungji, T.R.Zeliangia pa chief minister masü ser nung chief minister ama inyakba tekülak mapa asoshi merenshitsüla aser tai mapa ka inyaktsü ajungshiba asoshi Vikheho Swu nema tapet temerenshi agütsütsüla ta ACAUT telokisa metetdaktsü.