Opposition Party balala nungi lenirtemi Tir, Pranab ajuru

New Delhi, April 12, 2017: Bodhbarnü New Delhi nung Congress Tir, Sonia Gandhi aser taoba Ato kilonser, Manmohan Singh nati anir CPI nungi D Raja, CPI(M) lenir Sitaram Yachuri, BSP nungi Satish Chandra Mishra, TMC nungi Kalyan Banerjee aser DMK nungi lenirtemi Tir, Pranab Mukherjee ajurua temepishiba shidi ka agutsüba sülen meyipa aoba noksa nung angur. 

New Delhi, April 12 (Agencies): Bodhbarnü opposition party balala nungi lenirtemi Tir, Pranab Mukherjee ajurua pa dang, nashi kümzükertemi tim mesüi inyakba densema tawa tatatalokbatem atema tebilemtsü akaba lemsatep.
Taoba Ato kilonser, Manmohan Singh aser Congress Tir, Sonia Gandhi na leniba nung party balala nungi lenirtemi tanü Rashtrapati Bhavan nung Tir ajuru aser pa dang, linük nung temzüng-ozüng benoktsü atema tiyongi ia inyakdaktsüner, ta mepishi.
Parnoki tebilemtsü onük balala tezüluba ka nung agutsüba den külemi linük nung democracy aser sensotem indang temetentem kümzüka ayutsü mepishi.
Tir ajuruba sülen osangbenertem den jembidang Rajya Sabha nung opposition lenir, Ghulam Nabi Azad-i, “Linük nung tetsübu tensa ka lir, aser melung masürtem ola nembangtsür,” ta ashi.
Pai, “Onoki Tir dang tiyongtsüi aita India constitutional democracy aser sensotem indang temetentem kümzüka ayutsü atema linük nung temzüng ozüng benokdaktsüner ta mepishiogo,” ta metetdaktsü.