Nepal nung Madhesi party temi local elections mokdangtsü

Kathmandu, April 12 (Agencies): Mongulbarnü Nepal Parliament nung Linük Temzüng yanglushitsü atema sorkari onük benokba magizüker ta shia United Democratic Madhesi Front-i Nepal nung May 14 local-level elections nung shilem magitsü ta metetdaktsüogo.
Madhesi kin nung telok balala atema nokdakba United Democratic Madhesi Front (UDMF) lennirtemi ballot box nung parnok bendanga amshir ta shiyonga arur aser Bodbarnü senden ka amendang parnoki taruba elections nung shilem magitsü telemtetba agi.
Sendenji Bijulibazar, Kathmandu nung aliba Terai Madhes Loktantrik Party office nung ayonga amen aser idangji Mongulbarnü Parliament Secretariat nung Constitution amendment bill benokba indang onük jembi.
Iba bill nung parnoki takhangba agütsüba indang onük ajak enoka mali aser iba jagi elections nung shilem magitsü lemtet, ta UDMF lennirtemi ashi.
Iba bill ya Madhesi Morcha dang asüngtepa benok ta sorkari ashi saka ibaji tiyazü ta Terai Madhes Loktantrik Party Deputy General Secretary, Surendra Jha-ia ashi.
Maneni Brihotsibarnü Terai region district tem nung parnoki lungkak aitba sentongtem agitsü telemtetba agi.
Deobarnü parnokisa district tem nung election office tem nung oa lungkak aittsü. May 14 nü Nepal nung agitsü aliba local-level elections ya ajanga provincial aser national elections atema lenmang lapoktsütsü.