Manipur nung Headmaster ka dak miim mozü ayokertemi azük

Imphal, April 12 (Agencies): Khergao Primary School indang Headmaster, Muhammad Safar Ahamad dak miim mozü ayoker telok kati par school kima anepdang 10:00 ako meta kanga mejungi azük.
“Hero aser par jabaso Akash-i anir nisung 20-shi Khergao Primary School telungi anepdang 10:00 ako meta ait,” ta Manipur Students Federation (MSF) tatong tir, Oinam Premsagar-i MSF office nung osangbener den jembidang ashi.
“MSF-i Safar Ahamad ya JNIMS mozüki nung ajuru aser iba mapang Keikhu Maning Leikai tesem nung miim mozü ayoktsü pai nokdangba ajanga pa dak azük, ta Headmaster-i ashi,” ta Premsagar-isa ashi.
Iba tesem nung mozü ayoker Amina, Sahida, Marem aser Ibecha nunger ket nungi Wyoming (WY), Heroin No.4 aser Spasmo Proxyvon (SP) talubusa anguba MSF ajanga putet. Item mozü ayoker rongnung Hero aser Akash-na densema lir.
“Tanü nungi tenzüka anogo ana tsüngda nung nisung dak azüker tem parnok sasa MSF office bushia arutsüla aser ozüng alema miim mozü ayokertem dang state sorkari tapet temerenshi agütsütsüla,” ta MSF lenir-isa ashi.