Subansiri dam yanglutsüba anema longkak ait

Guwahati, April 12 (Agencies): Assam nung 2000-MW Lower Subansiri Hydroelectric Power (LSHP) Project tembanga yanglutsü asoshi Power Minister, Piyush Goyal-i sentong yangluba anema aser iba tzü nokdang (dam) yanglutsü asoshi anemba loktitemi longkak aitdar. Iba tzü nokdang ya ayonglanglen aliba nüburtem aser parnok kiojen atema lendong lir.
Iba longkak aitba sentong ayonger tongti lokti rongnung Krishak Mukti Sangram Samiti (KMSS), All Assam Students’ Union (Aasu) aser Asom Jatiyatabadi Yuba Chatra Parishad (AJYCP) teloktem lir. Union Minister-i Parliament nung jembidang iba tzü nokdang tekaraba nung yanglutsüba olen ka benokba sülen, Mongolbarnü iba anema asentenshir longkak ait.
Iba tzü nokdang ya Assam aserArunachal Pradesh arrtsü, Gerukamukh tesem nung lir. 2011 küm iba anema state ajunga nung lokti balalai nokdakba sülen mapa metemjungi anena liasü.
“Centre aser state nung BJP yimsüsüba menden kümtetba sülen, Lower Subansiri project renemtsü asoshi parnoki merangtsü ta temolung melemi bilema liasü. Tangbo BJP-i iba project tembangtsü asoshi merangtsü ta jangjaogo. Iba dak sendakba nung, tzü nokdang tang yanglua aliba tesem nung dang yanglutsü asoshi lemtetra, Assam ajunga nung longkak aittsü, ta KMSS-i Centre aser Satet nung BJP sorkar amokmeren. Iba ken o nung mongintemi tsü nokdang yanglutsüba ‘design’ nung timtem aika lir,” ta KMSS adviser Akhil Gogoi-i osangbenertem den jembidang ashi.
Mongolbarnü Dhemaji district kübok Gerukamukh tesem nung AASU züngsemtemi Goyal noksa ronga longkak aitba mapang tzü nokdang yanglutsüba sentong nung tekümzükba tsütsü ‘scientific’ telangzüba ka magütsü tashibo iba ya tembanga meyangludaktsütsü, ta yimyim ayim. “Election nung BJP nem vote agütsüba sülen iba sentong ya nüburtem ashioktsüba ka lir. Goyal lenisüba kübok Centre aser tzü nokdang yangluba anemer telok na tsüngda senden amenba mapang Subansiri dam design dak sendakba nung ‘scientific’ telangzüba ka mangu tashi yanglu metenzüktsü ta lemteta liasü. Aji saka tanü, dam design nung timtem aliba putetba, Assam nungi mongintem nem akümtsübo magütsüi iba sentong atema jembir,” ta AASU tongti zülur Lurinjyoti Gogoi-i ashi.
2014 Lok Sabha election nung iba onük ya kanga dang tongtibang süa jembia liasü.