ISIS-i Khristan anema rara ayongzükogo: Franklin Graham

April 13, 2017: Palm Sunday nü Egypt nung kiralongrar telok IS-i tenla ki ana poksatsüba sülen Hombarnü Daily Mail editor, Piers Morgan-i, kiralongrara telok, Islamic State-i Khristan tem anema inyaker ta jembia liasü aser iba oji metenja Evangelist, Billy Graham’er jabaso, Franklin Graham-i, ISIS-i Khristan tamangba yimsü anema rara ayongzükogo, ta ashi.
Egypt kübok Tanta aser Alexandria yimti na nung Khristantem tekülem sentep agia alidang kiralongraratemi bomb amshia tenlaki amakba lendong nung tajemba agi niusng 45 tepseta liasü.
Mezüngbuba tatalokbaji Tanta nung aliba St. George Tenla ki sabang anasa tokja aliba bomb ji tamangertem osang tajung ken atenba mapang apok. Iba sülen mapang tatsüka tsüngda Alexandria nunga taküm tenla agüja bomb pokdaktsür kati pa temang nung bomb alenloker St. Mark’s Orthodox Coptic Cathedral kima pokdaktsü.
Item amakba nung ajemdaker Billy Graham Evangelistic Association Tir, Franklin-i, “Piers Morgan-i Fox News dang Deobarnü Egypt nung tenlaki amakba indang jembibaji shitak dang,” ta ashi.
Pai ashiba agi, “Egypt nung atalokbaji mamangaka atangji. Nai ISIS nükjidongji metettsü, tang parnoki Middle East aser talisa Egypt nung inyakbaji Khristantem aser Khristan tamangba yimsü anema lir. Parnoki Khristan tamangba yimsü samatsüner aser ajak Muslim nunger kümdaktsüner, parnoki temeshi rara ayongner aser Khristantem samatsüner,” ta ashi.
“ISIS-i Khristan anema rara ayongogo ta pai (Morgan) jembibaji shitak jembiogo, ta Franklin-i ashi.
Morgan-i, Pope Francis-i Egypt semdangtsü sentong aliba atema tebilemtsü katsür, kechiyong IS-i pa dak tenük yoker, ta ashi.
Palm Sunday nü bomb amshia amakba nung ajemdaker tang Egypt nung ita asem ‘state of emergency’ ayongzükogo.
Pope-i April 28-29 anogotem nung Egypt yimtiba, Cairo semdangtsü sentong lir.