Jaguar F-Pace ya ‘2017 World Car of the Year’ shim

New York, April 13 (Agencies): 2017 New York International Auto Show nung Jaguar indang mezüngbuba SUV gari, F-Pace ya ‘2017 World Car of the Year’ shimtet.
Iba jenjang ngutettsü asoshi Germany nunger gari yangluba company tuluba ana, VW aser Audi indang Tiguan aser Q5 garitema final tashi atu.
F-Pace ya temaba sempet ngutetba kisüng masü saka design tajungtiba sempeta angu.
“F-Pace ya anogoshia tesem ajaklen bener senzütettsüsa yanglu. Sempet ana tashi anguba ajanga Jaguar company nung inyakertemi temolung agüja aser bendanga mapa inyakba sayur,” ta Jaguar Land Rover indang CEO, Dr. Ralf Speth-i ashi.
‘Luxury car’ indang noklem nung sempet ya Volvo S90 aser BMW 5-Series ajak ajangteta Mercedes E-Class nem agütsü.
‘World Car of the Year’ sempet ya New York Auto Show nung agütsür aser taküm iba tetoktepba nung ‘World Urban Car’ indang sempeta agütsü.
‘World Urban Car’ sempet ya BMW i3-i mezüngbuba agizükogo. Iba sempet asoshi Suzuki Ignis aser Citroen C3 garia temaba jenjang tashi atu saka BMW i3-i item garitem ajak dang points timba ngutet.
‘World Performance Car of the Year’ sempet ya Porsche-i indang 718 Cayman gari nem agütsü. Porsche-i yangluba gari ya iba sempet ya küm 13 tsüngda nung pongubenbuba angur asütsü.
Iba tetoktepba nung 718 Cayman gari ya McLaren 570S aser Audi R8 Spyder garitem dang tajungba liasü.
2017 ‘Green Car Award’ ya Toyota Prius nem agütsü. Iba gari agi 2017 North America Car of the Year sempet angur, Chevrolet Bolt aser Tesla Model X garitem ajunga ajangtet.
“Iba sempet ngutetba ajanga onoki terenlok asoshi nükla tasen yur inyakba kuli agütsür,” ta Toyota division indang Group VP, Jack Hollis-i ashi.