US nung mezüng Muslim tsür judge, Hudson süogo

New York, April 13 (Agencies) : New York, State nung okadak ajak dang tematiba nung associate judge aser US nung Muslim tsür rongnung mezüng judge, Sheila Abdus-Salaam tasümang Hudson ayong nung angu, ta yimti ketdangsertemi ashi.
Bodhbar nikongdang New York Police Department Harbour Unit nung ketdangsertemi West 132nd Street, Upper Manhattan nung nisung tasümang ka tzü nung pongdaka aliba agitet, ta osangkaket nung shia lir.
Arishi küm 65 tain, Judge Abdus-Salaam temangji tzüküm nung aliba sabang ka nung agiteta ayuba sülen mozü metetertemi la süogo ta osang tejangja metetdaktsü.
Police temi la komaser iba ayong nung asüar ibaji bushidangdar aser tang tashi nung Abdus-Salaam mapang kobika kidang mali asü ibaji mejangjai lir.
La temang nung tashiyim mapa inyakba kuli kecha mongutet aser la süoshi shitak sobur liasü, ta police-i ashi.
Bushisüngdangartemi la mang nung tashiyim mapa inyakba kecha meputet aser la mangji la kinungboi jangjatsü, ta ketdangser kati ashi.
2013 küm nungi Judge Abdus-Salaam ya State Court of Appeals nung aliba judge 7 rongnung la liasü, ta osangbenertemi ashi.
Ibaji masüdang küm pezü tashi la State Supreme Court, First Appellate Division nung associate justice mapa inyak aser Manhattan State Supreme Court justice nung küm 15 tashi inyaka liasü.
New York Law Department nunga la okatsür ka ama inyaka liasü.
Angh Andrew M. Cuomo-i, Judge Abdus-Salaam ya kecha agia manokshitsütetba ochi agi sünga aliba tetsür ka liasü, ta Bodhbarnü sangdong ka ajanga metetdaktsü.