CISTA-i süngo lu ayimertem senden ayongzük

Shillong, April 13 (Agencies): Confederation of Indian Small Tea Growers Association (CISTA)-i ayongzükba National Executive senden ka Umsing, Meghalaya nung April 8, 2017 nü amendang Nagaland Small Tea Growers’ Association nungia tir Wb.Shami Angh-i anir mendenpurtem kar oa denogo.
Iba senden nung Ministry of Commerce & Industries, Govt. of India nungi Secretary arua dena liasü. Iba senden nung Organic süngo lu ayimtsü nüngdakba indang tongtibangsa jembia liasü aser Nagaland nungi oa adenertemia Nagaland nung süngo lu ayimtsü asoshi ali tajung peria aliba indang metetdakja liasü. Iba senden nungsa Govt of India nungi Commerce & Industries ministry Secretary-i tarutsü nung süngo lu ayimtsü asoshi senotsü teyari peria agütsütsü nangzük aser peipei state nung süngo lu ayimertemi State Tea Growers Association nung züngsem akümtsü nüngdakba indang metetdakja liasü.